Presidenti i Shqipërisë, Ilir Meta, ka uruar të gjithë shqiptarët për një Vit të Ri ku, siç thotë ai, do ta shohë Shqipërinë më demokratike dhe më të drejtë, më të bashkuar e më të fortë.
Meta uroi që në vitin 2022 – i cili shënon edhe 30-vjetorin e marrëdhënieve me Bashkimin Evropian – të bëhet një hap i ri drejt anëtarësimit të Shqipërisë në BE.
“Të gjithë së bashku, të mobilizojmë fuqitë dhe energjitë më pozitive të kombit tonë, por edhe mendjet më të ndritura për të tejkaluar sfidat e mëdha që kemi përpara. Të mos i dorëzohemi indiferencës, përjashtimit dhe zemërimit. Të mos lejojmë që e vërteta të përmbytet nga gjepurat, pasiviteti dhe nënshtrimi. Me shpresë, besim, punë, këmbëngulje, përfshirje dhe dashuri ne mund të arrijmë gjithçka”, deklaroi Meta. “Në maj të vitit 1992, Shqipëria ishte vendi i parë në rajon që niste një marrëdhënie të re kontraktuale me Bashkimin Evropian. Ndaj uroj që 30 vite më pas, më në fund të shënojmë një hap të ri në procesin tonë të vonuar të anëtarësimit drejt Bashkimi Evropian, përmes një përfshirjeje dhe aktivizim më të madh qytetar për realizimin e kësaj aspirate strategjike”, shtoi Meta.
Presidenti i Shqipërisë në këtë urim pati thirrje edhe për përkushtim më të madh për të rinjtë në mënyrë që të ardhmen e tyre ta ndërtojnë në Shqipëri.
“Të mbrojmë vlerat tona kombëtare, të respektojmë liritë, të drejtat dhe dinjitetin njerëzor, t’u përkushtohemi të rinjve tanë për t’u ofruar atyre çdo mundësi që ta ndërtojnë të ardhmen evropiane këtu, në Atdheun e tyre. Shqipëria evropiane që duam të gjithë, stoliset edhe më shumë, kur bukuritë e saj natyrore pasurohen me bukuritë e punës dhe vitalitetit të popullit tonë e në radhë të parë, të të rinjve tanë”, përfundoi Meta./Gazeta “Enigma”/
