Kryeministri i Kosovës, Albin Kurti, ka uruar qytetarët e komunitetit rom në Ditën Ndërkombëtare të Romeve.
Kurti ka shkruar në Facebook se po punohet ngushtë që të hiqen paragjykimet dhe të zvogëlohet pabarazia në mënyrë që të rritën mundësitë për një jetë më të mirë, raporton Gazeta Enigma.
“Fjala rom do të thotë qenie njerëzore, njeri”, ka shkruar Kurti ndër të tjera.
Me rastin e kësaj dite, Kurti kujtoi edhe poetin e deputetin Kujtim Paçakun dhe vargjet e tij.
Poashtu, kryeministri tha se ishte kënaqësi e veçantë vizita e tij të martën në organizatën më të vjetër rome “Durmish Aslano” në Prizren.
Postimi i plotë:
Të nderuar qytetarë të komunitetit Rom,
Bahtalo Romano Dive!
Urime për Ditën Ndërkombëtare të Romëve!
Sot është ditë për të festuar kulturën, trashëgiminë, gjuhën dhe simbolet rome. Flamuri kaltër e gjelbër, me rrotën e kuqe në mes, përfaqëson lëvizjen e përparimin.
Në këtë ditë, nderojmë të gjithë ata burra e gra, të cilët angazhohen pandalur për të çuar përpara komunitetin rom. Po punojmë ngushtë bashkë që të heqim paragjykimet mes nesh, të zvogëlojmë pabarazitë dhe të rrisim mundësitë për jetë më të mirë.
Fjala rom do të thotë qenie njerëzore, njeri.
Sot kujtojmë edhe një njeri të veçantë që e kishim mes nesh, poetin e deputetin Kujtim Paçaku dhe vargjet e tij:
“… O njeri,
Neve na ka krijuar Zoti
Si ty, si mua, si edhe ata
Nën ngjyrën e lëkurës tënde Fshehur ke një ylber
Mu brenda shpirtit tënd
Andaj, ballin lartë!”
Ishte kënaqësi e veçantë të vizitoja të martën organizatën më të vjetër rome “Durmish Aslano” në Prizren.
