Pas takimit të djeshëm me pesë emisarët e huaj, presidenti i Serbisë, Aleksander Vuçiq tha se i është bërë e qartë se nëse nuk pranohet plani franko-gjerman, do të ketë pasoja.
Në lidhje me këtë çështje, ka folur emisari i SHBA-ve për Ballkanin Perëndimore, Gabriel Escobar.
Ai në një intervistë për Zërin e Amerikës ka thënë se i gjithë rajoni do të përballet me pasoja.
“Nuk dua të paragjykoj diskutimet që zhvillohen në kuadër të dialogut. Por mund të them se diskutuam hollësisht se cilat janë pasojat për rajonin, nëse nuk ecet përpara, për rajonin që të ketë një plagë të hapur, të ketë një konflikt të ngrirë, që në fakt nuk është i ngrirë, për komunitetin, që duhet të jetojë nën në trysni, siç ndodhë në veriun e Kosovës, me bllokada, trysni dhe njerëz në ankth. Kjo është ajo për të cilën po flasim. Këtë duam ta zgjidhin në kuadër të dialogut. Mendoj se patëm një bisedë shumë të mirë, mendoj se të gjithë e kuptojmë sfidën e vazhdimit të situatës aktuale”, ka thënë Escobar.
