Një aksion i Njësisë për Hetimin e Trafikimit me Narkotikë i zhvilluar gjatë ditës së sotme në rrugën “Sadulla Brestovci” në Gjilan, ka rezultuar me sekuestrimin e rreth gjysmë kilogrami marihuanë dhe arrestimin e një personi të dyshuar për shitblerje të drogës. I dyshuari është kapur në shtëpinë e tij në orët e pasdites.
Burimet nga Prokuroria kanë bërë me dije se i dyshuari është B.B., 24-vjeçar, në shtëpinë e të cilit është kryer bastisje nga njësia e Antidrogës, nën dyshimin se posedonte substanca narkotike.
Me rastin e kontrollit policor, të riut i janë gjetur disa qese me narkotikë, të llojit marihuanë, rreth gjysmë kilogrami që dyshohet se ishte e gatshme për t’u shitur nga i dyshuari.
Droga është sekuestruar nga zyrtarët policorë dhe pas përfundimit të aksionit, i dyshuari është shoqëruar në stacion policor për intervistim.
Ndaj tij, Prokurori i Shtetit ka urdhëruar inicimin e rastit për veprën penale “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge” dhe ndërmarrjen e veprimeve të nevojshme hetimore.
