Kryeministri i Kosovës, Albin Kurti, sot në një konferencë për media, ka folur për heqjen e masave të vendosura nga Bashkimi Evropian kundrejt Kosovës.
Kurti deklaroi se çështja e masave nuk është e lidhur me marrëveshjen bazike por me deeskalimin e situatës në Veri.
Ai tha se nuk ka arsye që masat të vazhdojnë, pasi përmendi atë se që dy muaj nuk ka incidente serioze dhe protesta të dhunshme në Veri, nënshkrimin e udhëzimit administrativ për largimin e kryetarëve në Veri dhe reduktimin e Policisë në dhe rreth objekteve komunale.
“Së pari çështja e masave dhe heqjes së tyre ka të bëjë kryekëput me deeskalimin e situatës në Veri, nuk ka të bëjë me marrëveshjen bazike. Ajo është proces i normalizimit të raporteve që e ka tekstin e dsakorduar në letër i cili duhet të shndërrohet në realitet të ri në terren, pra duhet zbatuar marrëveshja. Masat ne i kemi për shkak të përpjekjeve për destabilizim dhe dhunës në Veri të Ksoovës. Ne e kemi thënë qënë krye të herës që ne i dimë emrat dhe mbiemrat e atyre që e nxitën dhe e shkaktuan këtë dhunë. Dhuna nuk ishte anonime, impersonale, paçka se kishte njerëz me maska dhe fshiheshin perfundi kapelave”, tha Kurti.
Tutje ai shtoi se “Deeskalimi në masë të konsiderueshme ka ndodhur, ka më shumë se 2 muaj që ska incidente serioze dhe protesta të dhunshme. Por ajo për cfarë duhet të jemi të kujdesshëm është mundësia e rieskalimit dhe adresa për këtë nuk është në Prishtinë por në Beograd, mbase jo vetëm në Beograd është edhe në atë hotelin Kapaonik në anën tjetër të kufirit, përtej komunës së Leposaviqit. Pra, deeskalimi, i cili tashmë ka ndodhur, do të duhej të ishte i mjaftueshëm që ta rimendonin heqjen e masave”.
