Serbët po planifikojnë që nga 6 shtatori të organizojnë bllokada në të gjitha pikat kufitare me Kosovën.
Kështu ka deklaruar kryetari i të ashtuquajturit Asociacionit të Qytetarëve të Qarkut të Mitrovicës, Rasha Rojeviq.
Rojeviq është shprehur për agjencinë serbe të lajmeve “Beta”, duke njoftuar se bllokada do të zgjasë derisa Policia e Kosovës të tërhiqet nga veriu i vendit.
“Bllokada do të fillojë të premten dhe do të zgjasë derisa forcat policore të Kosovës të tërhiqen nga veriu i Kosovës dhe t’u kthehen serbëve institucionet e uzurpuara. Ne gjithashtu kërkojmë që KFOR-i, në përputhje me mandatin e Rezolutës 1244, të marrë kontrollin e veriut të Kosovës”, tha Rojeviq, shkruan Kossev, transmeton Gazeta Enigma.
Sipas tij, bllokadat do të zgjasin deri në plotësimin e të gjitha kërkesave të qytetarëve, teksa paralajmëroi se në këto bllokada nuk do të marrin pjesë serbët nga Kosova.
“Nuk presim ndihmë nga shteti dhe as nuk kemi nevojë për të. Serbët që jetojnë në Kosovë nuk do të marrin pjesë në bllokada që të mos ngacmohen nga Policia e Kosovës, por vetëm qytetarët nga territori i Serbisë, Mali i Zi dhe Republika Srpska”, tha Rojeviq.
Siç është paralajmëruar, do të bllokohen pikat kufitare në Bërnjak, Jarinje, Mërdare, Dheu i Bardhë dhe Kullë. /Gazeta Enigma
