Deputeti i Partisë Demokratike të Kosovës, Mërgim Lushtaku, e ka vlerësuar si ‘të paligjshëm’ vendimin e ministrit të Brendshëm, Xhelal Sveçla për vazhdimin e vlefshmërisë për gjashtë muaj të letërnjoftimeve të skaduara, raporton Gazeta Enigma.
Përmes një postimi në Facebook, Lushtaku thotë se ky vendim është shkelje e dispozitave të ligjit për letërnjoftim.
“Vazhdimi i vlefshmërisë së letërnjoftimeve të skaduara, duhet të shfuqizohet sa më parë, në mënyrë që të evitohen pasojat e pariparueshme që shkaktohen përgjatë krijimit, ndryshimit apo shuarjes së marrëdhënieve juridike që qytetarët i vendosin mbi bazën e letërnjoftimeve të skaduara.
Fakti se ky ligj përcakton gjoba për shkak të pavlefshmërisë së letërnjoftimit, konfirmon rëndësinë e mos lejimit të situatave në dëm të qytetarëve dhe institucioneve ligj-zbatuese, sepse siguria juridike është edhe parimi, e edhe qëllimi i ligjeve që duhet zbatuar, e jo interpretuar sipas dëshirës e për qëllime politike”, ka shkruar Lushtaku në një postim në Facebook.
