Real Madridi ka kërkuar që Barcelonës t’i hiqen nëntë tituj të La Ligës që katalanasit i fituan mes viteve 2001 dhe 2018, sipas raportimeve, pasi UEFA ka marrë dokumente të reja lidhur me çështjen Negreira.
Barcelona akuzohet se ka paguar 8.4 milionë euro te kompanitë në pronësi të José María Enríquez Negreiras, ish-zëvendëspresidentit të Komitetit Teknik të Gjyqtarëve në Spanjë, gjatë periudhës 2001-2018.
Klubi katalanas ka mohuar vazhdimisht çdo shkelje apo konflikt interesi, duke thënë se pagesat ishin bërë për raporte teknike rreth gjyqtarëve dhe se asnjëherë nuk ishte tentuar të ndikohej në vendimet e tyre gjatë ndeshjeve.
Presidenti i Barcelonës, Joan Laporta, e ka cilësuar më parë këtë çështje si një “fushatë gjigante për diskreditimin e reputacionit” të klubit, për shkak të “insinuatave shpifëse”.
Në anën tjetër, Real Madridi ka kërkuar vazhdimisht hetim të mëtejshëm dhe masa të mundshme sportive.
Në fund të vitit të kaluar, presidenti Florentino Pérez sulmoi autoritetet e futbollit spanjoll lidhur me çështjen Negreira, duke e cilësuar atë si “skandalin më të madh në historinë e futbollit”.
Ai kritikoi gjithashtu La Ligën dhe Federatën Spanjolle të Futbollit (RFEF), duke thënë se e kishin lënë Real Madridin “të izoluar” në përpjekjet e tij për drejtësi.
Tani duket se “Los Blancos” po vazhdojnë të kërkojnë masa.
Sipas një raportimi të “AS”, Real Madridi ka kërkuar që Barcelonës t’i hiqen titujt e fituar gjatë viteve në të cilat klubi katalanas dyshohet se i ka bërë pagesat ndaj Negreiras.
Raporti ka publikuar edhe një deklaratë të UEFA-s, e cila konfirmon se institucioni ka pranuar “një sasi të konsiderueshme dokumentesh lidhur me hetimin në vazhdim ndaj FC Barcelonës për çështjen që përfshin José María Enríquez Negreiran”.
Në deklaratë thuhet gjithashtu se inspektorët e Etikës dhe Disiplinës së UEFA-s i kanë pranuar këto dokumente të reja dhe do t’i vlerësojnë ato në kuadër të shqyrtimit të vazhdueshëm të rastit.
Të enjten pasdite, Real Madridi publikoi një deklaratë të fortë për të konfirmuar se UEFA ka pranuar ankesën e klubit.
“Ankesa e dorëzuar nga klubi ynë përfshin dokumentacion dhe prova të shumta lidhur me ngjarje me seriozitet të jashtëzakonshëm, të cilat ndikojnë drejtpërdrejt në integritetin e garës dhe besimin në sistemin e arbitrimit”, thuhet në deklaratën e Real Madridit.
Madridi kërkoi gjithashtu që hetimi të “vazhdojë me urgjencën më të madhe” dhe që organet kompetente “të marrin vendimet e duhura në përputhje me seriozitetin e fakteve të verifikuara”.
“Klubi ynë do të vazhdojë të bashkëpunojë në mënyrë aktive me UEFA-n dhe të ndërmarrë të gjitha veprimet brenda mundësive të tij për të sqaruar ngjarjet që i konsideron të papajtueshme me parimet e integritetit, transparencës dhe Fair Play-t që duhet të udhëheqin futbollin evropian”, thuhet më tej.
Pak më vonë, Barcelona iu përgjigj raportimeve për të ashtuquajturin “riaktivizim” të procedurave të UEFA-s në çështjen Negreira.
“UEFA nuk ka hapur asnjë procedurë të re ndaj FC Barcelonës. Procedurat u nisën në vitin 2023, me emërimin e dy hetuesve, të cilët që atëherë kanë ndërmarrë veprimet që i kanë konsideruar të përshtatshme.
Klubi ka respektuar gjithmonë të gjitha kërkesat e tyre. Këto procedura nuk janë rihapur, sepse ato nuk janë mbyllur asnjëherë.
Deklarata e UEFA-s konfirmon marrjen e dokumentacionit të dorëzuar nga Real Madridi dhe tregon se hetuesit do ta vlerësojnë atë në kuadër të hetimit ekzistues. I njëjti tekst i referohet shprehimisht, në dy raste, një hetimi dhe një shqyrtimi që janë ‘në vazhdim’”, thuhet në reagimin e Barcelonës.
Klubi katalanas shtoi se u takon hetuesve të vendosin se çfarë veprimi, nëse ka të tillë, e konsiderojnë të përshtatshëm lidhur me dokumentacionin.
“Sot, ata nuk i kanë bërë asnjë kërkesë të re FC Barcelonës dhe as nuk ia kanë përcjellë klubit ankesën e Real Madridit. Nëse e bëjnë këtë, klubi do të përgjigjet në përputhje me rrethanat, ashtu siç ka vepruar deri tani.
Në përputhje me legjislacionin në fuqi për këtë çështje, këto procedura i nënshtrohen rezultatit të çështjes penale që aktualisht po shqyrtohet në Spanjë dhe do të vazhdojnë të jenë të tilla.
Që nga fillimi i hetimit, FC Barcelona ka vazhduar të marrë licencën e UEFA-s pa kundërshtime dhe ka marrë pjesë në garat e UEFA-s”.
Barcelona më pas publikoi tekstin e plotë të deklaratës së UEFA-s, në të cilën thuhet se institucioni ka pranuar nga Real Madridi një sasi të konsiderueshme dokumentesh lidhur me hetimin në vazhdim ndaj Barcelonës për çështjen Negreira.
“Inspektorët e Etikës dhe Disiplinës së UEFA-s i kanë pranuar gjithashtu këto dokumente të fundit, të cilat do t’i vlerësojnë si pjesë e shqyrtimit të tyre në vazhdim”.
Në fund, Barcelona përsëriti se do të vazhdojë bashkëpunimin e plotë me autoritetet kompetente dhe bëri thirrje për “rigorozitet dhe saktësi” në raportimet për këtë procedurë.
