Shefi i Grupit Parlamentar të Partisë Demokratike të Kosovës, Abelard Tahiri gjatë seancës së Kuvendit të Kosovë kërkoi nga Qeveria e Kosovës që të merren masa të reja në luftën kundër COVID-19.
Ai vëri thirrje që të rritet numri i të vaksinuarve, ndërkaq tha se duhet të ketë angazhim më të madh të Qeverisë e posaçërisht të ministrit të Shëndetësisë, Arben Vitia.
“I bëj thirrje Qeverisë së Republikës së Kosovës të mos veprojë sikur këtë javë që pavarësisht thirrjeve nuk duket se janë rritur masat, në ndihmë të institucioneve të Kosovës në luftën kundër COVID-19. Sot na duhet angazhim më i madh se kurrë në fuqizimin e spitaleve rajonale dhe QKUK-së”, tha Tahiri.
Tutje, Tahiri tha se “I bëjmë thirrje gjithë qytetarëve që t’i dëgjojnë këshillat e profesionistëve e të vaksinohen”.
“Nëse nuk kemi angazhim të Qeverisë, edhe në muajt e ardhshëm do të jemi vendi me më së paku të vaksinuar. I bëj thirrje ministrit Vitia dhe Qeverisë që të kenë një angazhim më të madh. Java tjetër të jetë me masa shtesë”, kërkoi Tahiri në emër të deputetëve të PDK-së.
