Kryeministri i Kosovës, Albin Kurti, ka njoftuar gjatë ditës së djeshme se pritet ardhja e 650 mijë vaksinave në vend, deri më datën 6 shtator.
Kështu njoftoi Kurti gjatë mbajtjes së mbledhjes së qeverisë, me ç’rast u shtrenguan masat kundër koronavirusit, për shkak të përkeqësimit të situatës.
“Deri me 6 shtator presim që të arrijnë edhe 650 mijë vaksina. Kemi rritur kapacitetet, ndërsa po shohim që edhe interesimi i qytetarëve për vaksinim po shtohet. Dhe kjo na jep shpresë që krahas respektimit të masave do të mund t’ia dalim së bashku ta fitojmë këtë betejë, e gradualisht edhe luftën kundër pandemisë COVID-19”, ka njoftuar Kurti.
Ndërsa, ministri i Shëndetësisë, Arben Vitia, ka paralajmëruar aplikimin e dozës së tretë të vaksinës kundër koronavirusit, në rast se paraqitet nevoja.
Situata në vendin tonë me koronavirusin është shumë e rëndë, në 24 orët e fundit si pasojë e COVID-19 kanë vdekur 18 persona, ndërsa rreth 2 mijë qytetarë kanë rezultuar pozitiv. Siptalet janë stërmbushur me pacientë që po trajtohen nga ky virus, ndërsa bëhet fjalë për mbi 25 mijë raste aktive në vend.
