Ambasadori i Bashkimit Evropian në Beograd, Emanuele Giaufret, ka thënë se Kosova nuk është ‘alfa dhe omega’ e integrimeve evropiane të Serbisë.
Në një intervistë për Euronews Serbia, Giaufret ka thënë se shtylla e parë e integrimit evropian është sundimi i ligjit, lufta kundër korrupsionit dhe krimit të organizuar, si dhe pluralizmi mediatik.
Sipas tij, shtylla e dytë është në mënyrë të pashmangshme normalizimi i marrëdhënieve ndërmjet Kosovës dhe Serbisë.
“E rëndësishme është edhe njëra edhe tjetra, ne nuk e kemi lënë anash shtetin e së drejtës, përkundrazi, është një çështje e rëndësishme në punën tonë, por edhe normalizimi i marrëdhënieve, sepse ne duam të gjejmë një rrugëdalje nga kjo situatë për t’ua lehtësuar jetën njerëzve. ‘ drejt normalizimit sepse është një tregues se sa serioze është BE-ja për zgjerimin dhe dëshirën e saj për të përqafuar Serbinë në familjen e saj. Dhe për këtë ne kemi nevojë për një proces normalizimi – kështu që është pjesë e paketës”, ka thënë Giaufret.
Lidhur me atë se nëse kjo do të thotë se Serbia, me njohjen e pavarësisë së Kosovës, është pjesë e asaj pakete, diplomati evropian përsëriti fjalët e kryetares së Komisionit Evropian, Ursula von der Leyen, sipas së cilës bëhet fjalë për “zbatimin e marrëveshjes për rrugën drejt normalizimit të marrëdhënieve”.
“Ne po flasim për zbatimin e marrëveshjeve të arritura dhe duhet të ecim përpara. Jo vetëm nga pala serbe, por edhe Kosova duhet të zbatojë pjesën e obligimeve të saj. Por ne duhet të jemi në gjendje t’i tejkalojmë bllokadat ekzistuese sepse e kemi parë si është situata kur kriza është Kosova dhe kjo nuk është produktive për askënd dhe shkakton shumë dëme, prandaj duhet të kalojmë në zbatimin e marrëveshjes për normalizim, do të ndihmojë shumë në rrugën drejt BE-së së bashku me reformat e tjera”, shpjegoi ai.
