Mbrëmjen e së martës në hyrje të banesës së tij në Kaçanik, mbeti i vrarë rreshteri Muhamed Likaj, raporton Gazeta “Enigma”.
Në konferencën për media kryeprokurori Burim Çerkini, ka deklaruar se dy persona janë të dyshuar në këtë rast, derisa dyshohet se nga vendi i ngjarjes kanë ikur në këmbë.
“Sipas provave që kemi mbledhur, dyshohet se dy persona kanë ikur nga vendi i ngjarjes, pra nga banesa ku ndodhi rasti tragjik. Nga ajo qysh shihet deri më tani, ata kanë ikur në këmbë, nuk kemi të dhëna nëse kanë shfrytëzuar më vonë ndonjë veturë, apo ndonjë mjet tjetër, për ikjen nga vendi i ngjarjes”, tha ai në një konferencë për media.
“Në vendin e ngjarjes është gjetur arma e zyrtarit policor, si dhe katër gëzhoja”, u shpreh tutje kryeprokurori. Ndër të tjera, ai tha se arma e dorasëve nuk është gjetur ende. Sakaq i ndjeri do të varroset sot pas orës 17:00 në “varrezat e dëshmorëve”. /Gazeta Enigma/
