Diplomacia kosovare në gjumë: Tre vite, zero njohje

Pavarësia e Kosovës e cila u shpall me 17 shkurt të vitit 2008-të, është njohur deri me tani zyrtarisht nga 117 prej gjithsej 193 Shteteve anëtare të UN-it, shkruan Gazeta “Enigma”.

Menjëherë pas shpalljes së Pavarësisë, diplomatët kosovarë i përvishen punës duke kërkuar njohjen e saj nga shtetet në të gjithë botën.

Njohja e parë erdhi pas disa orësh nga Republika e Kosta Rikës, duke u bërë shteti i parë që njeh Kosovën si shtet të pavarur.

Më 8 mars 2008, Carl Bildt, Ministër i Jashtëm i Suedisë e vizitoi Kosovën, duke u parë diplomat i parë i huaj që e viziton vendin tonë.

Lidhur me këtë çështje Gazeta “Enigma”, ka kontaktuar me njohësin e çështjeve ndërkombëtare Shqiprim Pula, i cili ka komentuar për stagnimin e njohjeve ndaj Kosovës si shtet që nga viti 2020.

“Kosova nuk mund t’i marrë njohjet kur ne i duam por kur shtetet janë të gatshme t’a njohin mëvetësinë e Kosovës. Ka përpjekje për zhvillimin e bashkëpunimit rajonal e ndërkombëtar, gjithashtu ka përpjekje për të përfunduar tranzicionin e konsolidimit të institucioneve për të nxitë marrëdhënie të harmonizuara edhe të zhvillojë gradualisht mirëqenien ekonomike të qytetarëve të vendit”, ka deklaruar Pula.

Mungesa e njohjeve të reja sipas Pulës është që nga themelimi i shërbimit të jashtëm të Kosovës, ku asgjë nuk ka qenë si është dashur të jetë, ka pasur edhe mangësi të shumta që kanë ndikuar në një rezultat të tillë që të mos kemi prurje të njohjeve të reja.

Sipas tij ka munguar edhe plani lobues nga personeli diplomatik, gjithashtu tani e sa vite nuk kemi as edhe një analizë mbi mangësitë dhe raportimin cilësor.

Pra, të gjitha këto bashkë kanë ndikuar që të kemi ngecje në prurjen e njohjeve të reja për shtetin tonë.

“Qysh kur është themeluar shërbimi i jashtëm i Kosovës, ka pasur mangësi të theksuar në intelektualitetin e shumicës së diplomatëve tanë për shkak të ndërhyrjeve direkte të politikës, e si rezultat kemi pasur fare pak rezultate në prurje të njohjeve të reja”, ka theksuar Pula për “Enigmën”.

“Madje, ka munguar hartimi dhe monitorimi i një plani lobues, një planifikimi të mirëfilltë e koherent për forcimin e subjektivitetit të shtetësisë nga personeli diplomatik. Për fat të keq, ndër vitesh nuk ka pasur analizë mbi mangësitë dhe raportim cilësor, prandaj kemi pasur ngecje në njohje të reja”, tha ai.

Çka duhet të bëjë Ministria e Punëve të Jashtme që të sjellin njohje të reja?

“Se çfarë duhet të bëjmë në këtë fazë është që MPJ dhe institucionet tjera t’i  koordinojnë dhe udhëzojnë personelin përgjegjës rreth një analize mbi mangësitë dhe identifikimin e prioriteteve duke marrë në konsideratë përgjegjësitë institucionale në kuadër të strategjive ekzistuese por edhe atyre të reja ndërministrore për të sjellë rezultate, përkatësisht njohje të reja”, tha Pula.

Institucionet e Kosovës dhe procesi i dialogut

Sipas Pulës dialogu proces i pandalshëm në proceset anëtarësuese të Kosovës.

“Procesi i dialogimit është proces i pandalshëm, dhe natyrisht ka rëndësi substanciale në proceset anëtarësuese të Kosovës. Kosova politike duhet që në kuadër të procesit të dialogut t’i përmbyll shumë tema të mbetura hapur, e që qëllim përfundimtar ka paqen e përhershme në rajon”, ka përfunduar ai.

Deputeti i Lidhjes Demokratike të Kosovës, Anton Quni, ka thënë se dialogu Kosovë-Serbi është çështje që lidhet ngushtë me procesin e njohjeve.

Quni në një përgjigje për Gazetën “Enigma” ka theksuar se drejtuesit e institucioneve po shpenzojnë shumë energji për proceset e brendshme dhe kanë “harruar” t’i kundërvihen fushatës së egër të Serbisë.

“Është fakt që procesi i njohjeve është i ndërlidhur ngushtë me dialogun Kosovë-Serbi. Por kjo nuk nënkupton që qeveria nuk ka përgjegjësi në këtë aspekt”, ka thënë Quni.

“Si përgjegjës për qeverisje, drejtuesit e institucioneve dhe me theks të dikasterit përkatës duhet të mos shpenzojnë shumë energji me proceset e brendshme por të kenë një strategji se si ti kundërvihen fushatës së egër të Serbisë e po ashtu të argumentojnë më fuqishëm tek shtetet që nuk e kanë njohur Republikën e Kosovës që ta bëjnë një gjë të tillë, duke përdorur mendimin e GJND-së, se Pavarësia e Kosovës nuk është në kundërshtim me të drejtën ndërkombëtare”, tha ai.

Quni: Njohja e fundit u sigurua nga Qeveria Hoti

Deputeti nga Lidhja Demokratike e Kosovës, Anton Quni, ka theksuar se lobimi është segmenti kyç i prurjeve të reja, gjë të cilën nuk po e bënë Qeveria aktuale.

“Një segment i rëndësishëm i kësaj janë njohjet ndërkombëtare dhe lobimi. Jemi dëshmitar se nga Qeveria Hoti, kur u sigurua njohja nga Izraeli, me rolin e veçantë të SHBA-së, nuk pat njohje të reja”, ka deklaruar Quni për “Enigmën”.

Sipas tij “ngecja në këtë fushë është rezultat i performancës së dobët së institucioneve përgjegjëse në marrëdhëniet ndërkombëtare dhe rrafshin diplomatik. Zbehja e marrëdhënieve me partnerët strategjik edhe më shumë po e rëndon këtë situatë”.

Qeveria Kurti dhe bashkëpunimi me SHBA-të

Quni tutje ka bërë thirrje kundrejt qeverisë aktuale që sa më shumë të bashkëpunoj ngushtë me SHBA-të.

“Është urgjente nevoja që qeveria aktuale të e rikthej besimin tek qendrat e vendimmarrjes e në veçanti të bashkëpunoj ngushtë me SHBA-të, gjithnjë me staf diplomatik të profilit të lartë moral dhe profesional” tha ai.

“Qendrat e lobimit të përbëra nga personalitetet ndërkombëtare dhe vendore janë më se të domosdoshme. Artikulimi politikave të kjarta për orientimin tonë euroatlantik janë siguria e fuqizimit të shtetit të Kosovës”, ka përfunduar ai.

Gazeta “Enigma” për këtë çështje ka provuar të komunikoj edhe me Ministrinë e Punëve të Jashtme të Kosovës, por nuk kanë qenë të qasshëm.

/GAZETA ENIGMA/

Lista e shteteve që e njohin Kosovën si shtet të pavarur: