Deputeti nga radhët e Lidhjes Demokratike të Kosovës, Avdullah Hoti, e ka akuzuar Qeverinë Kurti se i ka mashtruar qytetarët lidhur me premtimin për ndalje të privatizimeve dhe themelimin e Fondit Sovran.
Hoti ka kujtuar deklaratën e kryeministrit Albin Kurti i cili kishte thënë se Agjencia Kosovare e Privatizimit do të shuhet se asetet e saj do i kalojnë Fondit Sovran. Ky Fond ende s’është krijuar, edhe pse ka qenë i listuar si prioritet në programin qeverisës së partisë në pushtet.
Hoti ka publikuar një shpallje të AKP’së lidhur me “Valën 62” të privatizimit, derisa ka thënë se procesi i privatizimit po vazhdon valë-valë nga ata që “shanin e akuzonin”.
“Mashtrimet po dalin në shesh çdo ditë. Për dhjetë vite shanin e akuzonin secilin për privatizim, me e pa të drejtë. I mashtronin qytetarët se do të vlerësojnë privatizimet, dhe do të themelojnë Fondin Sovran me asete të Agjencisë së Privatizimit. Sapo erdhën në pushtet, privatizimi po vazhdon valë-valë”, ka shkruar Hoti.
