Futbollisti legjendar i Liverpoolit, Jamie Carragher, u tregua shumë i ashpër ndaj politikës sportive të PSG-së dhe pranoi se ishte i lumtur që mbrëmë u eliminuan nga Liga e Kampionëve pas humbjes nga Bayern Munich.
Carragher komentoi lojën në shfaqjen e njohur të CBS, e cila përfshin gjithashtu Kate Abdo, Thierry Henry dhe Micah Richards.
“Unë sinqerisht jam i kënaqur që PSG është jashtë. Nuk më pëlqen mënyra se si ata janë të organizuar. Nuk është një ekip, është një rrëmujë e madhe. Ata kanë dalë në raundin e 1/16 në pesë nga shtatë sezonet dhe ata shpenzojnë më shumë para se kushdo tjetër”, ka thënë Carragher.
Anglezi shtoi se PSG ka lojtarët më të mirë në botë, duke shtuar se Kylian Mbappe do të largohet.
“Ata kanë individë që ne të gjithë i duam, por jam i kënaqur që kjo u ndodhi atyre sepse tregon se sa i rëndësishëm është ekipi. Ata nuk janë një ekip dhe Kylian Mbappe duhet të largohet nga ai klub”, nënvizoi ai.
Kujtojmë se Bayern Munich kaloi në çerekfinale të Ligës së Kampionëve pasi mposhti Paris Saint-Germainin me rezultat të përgjithshëm 3-0.
Bavarezët fituan 1-0 në ndeshjen e parë në Paris, ndërsa mbrëmë fituan 2-0 në Allianz Arena me golat e Eric Maxim Choupo-Moting dhe Serge Gnabry.
