Komuna e Gjilanit që nga dhjetori i vitit 2024 ende nuk i ka ekzekutuar bursat për studentët që janë përzgjedhur si fitues të tyre nga viti akademik 2023/2024, shkruan Gazeta Enigma.
Kështu ka konfirmuar për Gazetën Enigma një nga studentet përfituese, D.F, e cila thekson se ndonëse viti akademik përfundon së shpejti, bursat ende nuk i janë ndarë studentëve.
“Unë jam përfituese e bursës për vitin akademik 2023/2024, mjetet është dashtë si zakonisht me u ekzekutu më herët, por tash jemi në vitin 2025 në muajin prill dhe akoma nuk ka asgjë të re”, tha studentja.
Duke theksuar se viti akademik përfundon së shpejti, ajo thekson se qëllimi i bursës është që “t’i lehtësojnë studimet në aspektin financiar dhe me i ndihmu prindërve në disa shpenzime”, çka nuk është mundësuar ende nga ekzekutivi i Komunës së Gjilanit.
“Këto bursa besoj që asnjëri nga përfituesit nuk i shpenzon në lluks, por, llogaritën si një ndihmesë financiare në procesin e studimeve me të cilat mund të mbulojmë disa shpenzime, e kjo punë është si zingjirë, ku përmes bursave ua lehtojmë edhe prindërve tanë të cilët për një afat kohor lirohen nga disa përgjegjësi, duke e marrë parasysh që ekonomia në vend nuk është më e mira ndonjëherë dhe ka shumë familje që nuk mund të përballojnë shpenzime të studimeve”, u shpreh D.F për Enigmën.
Por çka realisht po ndodhë me bursat?
Ndonëse buxheti i Komunës së Gjilanit është miratuar në shkurt të këtij viti, përfituesit e bursave që nga muaji dhjetor i vitit 2024, ende s’i kanë marrë pagesat e tyre.
Gazeta Enigma ka dërguar pyetje në Komunën e Gjilanit për të marrë sqarime për këto vonesa, por që të njëjtin nuk janë përgjigjur deri në publikimin e këtij artikulli.
Ndërkohë Enigma kishte kontaktuar me 27 shkurt me Drejtorin e Arsimit në Gjilan, Shpend Nuhiu, i cili e kishte konfirmuar se shpejt pritet ekzekutimi i bursave.
Sipas tij pas miratimit të buxhetit komunal do të ekzekutohen edhe mjetet e bursave, por një gjë e tillë nuk ka ndodhur akoma.
“Shpresoj që me aprovimin e buxhetit në Kuvendin Komunal shumë shpejt do të fillojmë edhe me ndarjen e bursave për studentët fitues”, kishte thënë Nuhiu.
Ndërkohë asamblistja e LDK-së, Gresa Avdiu, për Gazetën Enigma thotë se vonesën e krijuar në ndarjen e bursave për studentët përfitues e kishte ngritur edhe më herët në Kuvendin Komunal, teksa faji sipas saj qëndron tek partia në pushtet.
Tutje ajo shton se nga Drejtori i Arsimit të Gjilanit i është konfirmuar se po presin “që buxheti i votuar në Kuvendin Komunal të Gjilanit të miratohet edhe nga Kuvendi i Republikës së Kosovës, në mënyrë që të mund të kryhen pagesat e nevojshme”.
“Komuna e Gjilanit prej kohësh nuk qeveriset. Aktualisht, ajo vetëm administrohet nga punonjësit e saj, ndërsa gjatë këtij viti, këta punonjës u përballën edhe me një presion të paparë ndonjëherë, që kishte të bënte me pagat e tyre nga mosvotimi eventual i buxhetit komunal për vitin 2025. Inatet politike dhe sjellja krejtësisht joinstitucionale e pushtetit aktual kanë bërë të pamundur bashkëpunimin mes pozitës dhe opozitës në Gjilan, pavarësisht gatishmërisë së anëtarëve opozitarë të Kuvendit. Që nga fillimi i këtij mandati, kemi propozuar iniciativa si për buxhetet e kaluara ashtu edhe për këtë buxhet, por asnjëherë ato nuk janë marrë parasysh”, thotë Avdiu.
Sipas Avdiu, kjo “ngecje” tregon nivelin e bashkëpunimit mes partisë në Qeverisje dhe Komunalës, duke potencuar se është hera e parë që Kuvendi është përjashtuar nga procedurat ligjore për hartimin e vitit 2025.
“Kjo ngecje në këtë vit, na tregon se partitë politike, sidomos ato në qeverisje, duhet të jenë shumë bashkëpunuese me përfaqësuesit e qytetarëve, sepse janë ata që në fund miratojnë buxhetin, dhe këtë e kanë të garantuar me ligj. Është hera e parë që Kuvendi është përjashtuar tërësisht nga procedurat ligjore për hartimin e buxhetit të vitit 2025, edhe pse ai duhet të jetë iniciatori për fillimin e hartimit të tij, përmes dëgjimeve publike fillimisht, deri në votimin përfundimtar në Kuvendin Komunal”, përfundoi Avdiu./ GazetaEnigma/
