Ministria e Punëve të Jashtme pa strategji konkrete, për 4 vite vetëm një njohje

Më 17 shkurt 2008-të, Kosova u bë shteti më i ri në Botë duke e shpallur Pavarësinë e saj. Pas shpalljes së Pavarësisë, diplomatët kosovarë i përvishen punës duke kërkuar njohjen e saj nga shtetet në të gjithë botën.

Njohja e parë erdhi pas disa orësh nga Republika e Kosta Rikës, duke u bërë shteti i parë që njeh Kosovën si shtet të pavarur.

Më 8 mars 2008, Carl Bildt, Ministër i Jashtëm i Suedisë e vizitoi Kosovën, duke u parë diplomat i parë i huaj që e viziton vendin tonë.

Emir Abrashi nga Demokracia Plus në një bisedë për Gazetën Enigma, ka thënë se institucionet e Kosovës kanë qenë të angazhuara për njohjen e Pavarësisë së Kosovës.

Sipas Abrashit, njohja e Pavarësisë së Kosovës nga shtetet e ndryshme të Botës është bërë me ndihmën e aleatëve tanë dhe me zotësinë e individëve që kanë pasur qasje në shtetet të ndryshme për t’i sjellë njohje të reja shtetit tonë.

Kosova në katër vitet e fundit e ka siguruar vetëm një njohje të re nga Izraeli, sipas Abrashit kjo njoihje u bë me ndërmjetësimin e Shteteve të Bashkuara të Amerikës.

“Shtetet të cilat kanë qenë të gatshme ta njohin Republikën e Kosovës, e kanë njohur atë në vitet e para, kurse ato të cilat kanë qenë të lëkundura, është arritur që të binden me kalimin e viteve”, thotë Abrashi me skepticizëm.

Abrashi thotë se shtetet që nuk po e njohin Kosovën kanë probleme të brendshme në territoret e tyre.

“Ndërkaq tani, jemi në pikën që shtetet të cilat nuk e njohin aktualisht Kosovën, janë shtete të cilat ose mund të kenë probleme përbrenda territoreve të tyre dhe nuk dëshirojnë të krijojnë precedentë për lëvizjet separatiste, ose janë shtete të cilat janë në sferën e ndikimit të aleatëve të Serbisë – Rusisë dhe Kinës. Prandaj, edhe në tri vitet e fundit, Kosova ka arritur ta sigurojë vetëm një njohje të re nga Izraeli – dhe atë me ndërmjetësimin e Shteteve të Bashkuara të Amerikës”, ka deklaruar Abrashi.

Abrashi ka theksuar se Kosova duhet të vazhdoj të punojë me aleatët tanë, që t’i sjellin Kosovës sa më shumë njohje.

“Kosova duhet që të punojë aktivisht në forcimin e mëtejshëm të diplomacisë sonë, si dhe të punoj ngushtë me aleatët tanë, për tu munduar që të shtyjnë shtete të tjera drejt njohjes së pavarësisë së Kosovës”, ka thënë ai.

Sipas tij krerët institucional të Republikës së Kosovës nuk duhet që ta neglizhojnë procesin e dialogut.

“Përkundrazi, ata duhet që të angazhohen, në bashkëpunim me opozitën dhe shoqërinë civile, në hartimin e një strategjie për dialogun, e cila do të vendoste prioritetet tona, por edhe vijat e kuqe në këtë proces, dhe më pas ne duhet që të sigurojmë mbështetjen e aleatëve tanë perëndimor për t’i shtyrë përpara prioritetet tona”, deklaroi përfaqësuesi i Demokracia Plus, Abrashi.

Analisti politik, Arbnor Sadiku, për Gazetën Enigma ka thënë mobilizimi i Serbisë me shtetet aleate të saj e ka lën Kosovën pa njohje të reja.

“Për faktin se ka pasur një mobilizim të Serbisë, karshi vendeve të saja aleate, që të mos njihet Kosova. Duke qenë aleancë me Rusinë, dhe Kinën, si dy vende me fuqi të madhe ekonomike, politike, si dhe ushtarake”, ka thënë Sadiku.

Sipas Sadikut, Kosova me marrëveshjen e Uashtingtonit ishte pajtuar që pas njohjes nga Izraeli mos të bëjë për njohje të reja. 

 “Kosova me marrëveshjen e Uashingtonit ishte pajtuar që pas pranimit të njohjes nga Izraeli, mos të loboj për njohje të reja, por meqë është ndërruar administrata Trump, me atë të Bidenit, ka ndryshuar edhe kursi i politikës së Kosovës”, ka thënë ai.

Sadiku potencon se ndërrimi i shpeshtë i qeverive në Kosovë ka ndikuar që mos të ketë njohje të reja në vitet e fundit.

“Krizat qeveritare dhe ndërrimi i shpeshtë i qeverive në Kosovë ka ndikuar në mos pasjen e njohjeve të reja, për vet faktin se janë ndërruar shpesh kryeministrat, dhe ministrat e punëve të jashtme” ka deklaruar Sadiku.

Gazeta ‘Enigma’ për këtë çështje ka provuar të komunikoj edhe me Ministrinë e Punëve të Jashtme të Kosovës, por nuk kanë qenë të qasshëm.

Deri tani Pavarësia e Kosovës është njohur nga 117 shtete./Gazeta Enigma/

Këto janë vendet që kanë njohur Kosovën si shtet: