Koalicioni i OJQ-ve për Mbrojtjen e Fëmijëve – KOMF dhe Këshilli i Nxënësve të Kosovës, deklarojnë se nëse sot më 1 shtator nuk fillon mësimi, rreth 320 mijë nxënësve do t’i mohohet e drejta themelore për arsim.
Me anë të një komunikate për media thuhet se në mesin e tyre, e drejta për arsim do t’u mohohet rreth 25 mijë fëmijëve të cilët presin të ulen në bankat e shkollës për herë të parë.
“Mohimi i arsimit është shkelje e të drejtës themelore të fëmijës, e garantuar me Kushtetutën e Republikës së Kosovës dhe Konventën Ndërkombëtare për të Drejtat e Fëmijës”.
“KOMF i bën thirrje palëve në këtë proces të kenë konsideratë kryesore interesin më të mirë të fëmijës, të gjejnë një zgjidhje të përbashkët, pasi ndërprerja e arsimit dëmton më së shumti fëmijët”, thuhet në kumtesën e Koalicionit të OJQ-ve për Mbrojtjen e Fëmijëve.
