Për tre vjet vetëm një njohje, MPJ-ja pa strategji konkrete

Kosova deklaroi pavarësinë me 17 shkurt 2008. Menjëherë pas shpalljes së pavarësisë, u dërguan letra në drejtim të të gjitha qeverive të botës për njohjen e saj. Njohjet e para filluan menjëherë pas disa orësh, ndërsa më 18 shkurt 2008, Afganistani ishte shteti i parë që njohu Kosovën shtet të pavarur. Më 8 mars 2008, ministri i parë i jashtëm që e vizitoi Kosovën ishte Carl Bildt, Ministër i Jashtëm i Suedisë, shkruan Gazeta “Enigma”.

Emir Abrashi, përfaqësues i Demokracia Plus, tha per Gazeten Enigma se pas shpalljes së pavarësisë në vitin 2008, institucionet e Kosovës dhe Ministria e sapo-formuar e Punëve të Jashtme, kanë qenë të involvuara aktivisht për sjelljen e njohjeve për pavarësinë e Kosovës. Kjo është bërë edhe me ndihmën e madhe të aleatëve tanë, por edhe të individëve të cilët kanë pasur akses në shtete të ndryshme, për të sjellë njohje të reja për shtetësinë tonë.

Njëherit Abrashi shtoi se në tri vitet e fundit, Kosova ka arritur ta sigurojë vetëm një njohje të re nga Izraeli – dhe atë me ndërmjetësimin e Shteteve të Bashkuara të Amerikës.

“Shtetet të cilat kanë qenë të gatshme ta njohin Republikën e Kosovës, e kanë njohur atë në vitet e para, kurse ato të cilat kanë qenë të lëkundura, është arritur që të binden me kalimin e viteve. Ndërkaq tani, jemi në pikën që shtetet të cilat nuk e njohin aktualisht Kosovën, janë shtete të cilat ose mund të kenë probleme përbrenda territoreve të tyre dhe nuk dëshirojnë të krijojnë precedentë për lëvizjet separatiste, ose janë shtete të cilat janë në sferën e ndikimit të aleatëve të Serbisë – Rusisë dhe Kinës. Prandaj, edhe në tri vitet e fundit, Kosova ka arritur ta sigurojë vetëm një njohje të re nga Izraeli – dhe atë me ndërmjetësimin e Shteteve të Bashkuara të Amerikës”, tha Abrashi për Gazetën “Enigma”.

Ndër të tjera Abrashi tha se Kosova duhet të vazhdoj të punojë me aleatët tanë, që të sjellim sa më shumë shtete drejt njohjes së pavarsisë së Kosovës.

“Kosova duhet që të punojë aktivisht në forcimin e mëtejshëm të diplomacisë sonë, si dhe të punoj ngushtë me aleatët tanë, për tu munduar që të shtyjnë shtete të tjera drejt njohjes së pavarësisë së Kosovës. Megjithatë, Republika e Kosovës duhet që të angazhohet seriozisht në procesin e dialogut, me synimin që t’i normalizojë marrëdhëniet me Serbinë dhe të arrijë njohjen e ndërsjellë mes të dyja vendeve. Dhënia epilog këtij procesi i cili po zgjat tash e një dekadë do t’i siguronte Kosovës edhe konsolidimin e subjektivitetit të saj në arenën ndërkombëtare, pasi që pas njohjes nga Serbia, shtetet e tjera jo-njohëse nuk do të kishin më asnjë arsye për ta prolonguar njohjen”, tha ai për Enigmen.

Prandaj, krerët institucional të Republikës së Kosovës nuk duhet që ta neglizhojnë procesin e dialogut, tha ai.

“Përkundrazi, ata duhet që të angazhohen, në bashkëpunim me opozitën dhe shoqërinë civile, në hartimin e një strategjie për dialogun, e cila do të vendoste prioritetet tona, por edhe vijat e kuqe në këtë proces, dhe më pas ne duhet që të sigurojmë mbështetjen e aleatëve tanë perëndimor për t’i shtyrë përpara prioritetet tona”, deklaroi përfaqësuesi i Demokracia Plus, Abrashi.

Ai ka thënë se nëse vazhdohet e njëjta qasje sikur kjo që kemi parë deri më tani, atëherë une nuk shoh ndonjë rezultat konkret nga takimet në Bruksel. E, në mungesë të rezultateve, Kosovës do t’i prolongohet procesi i forcimit të subjektivitetit ndërkombëtar, dhe rrjedhimisht edhe anëtarësimi në organizata ndërkombëtare.

Ndërkohë, Analisti politik, Arbnor Sadiku, për Gazetën Enigma ka thënë se diplomacia e dobët që ka pasur Kosova e ka lënë pa njohje.

Tutje Sadiku ka thënë se “për faktin se ka pasur një mobilizim të Serbisë, karshi vendeve të saja aleate, që të mos njihet Kosova. Duke qenë aleancë me Rusinë, dhe Kinën, si dy vende me fuqi të madhe ekonomike, politike, si dhe ushtarake”, raporton “Enigma”.

“Ndërsa, Kosova me marrëveshjen e Washingtonit ishte pajtuar që pas pranimit të njohjes nga Izraeli, mos të loboj për njohje të reja, por meqë është ndërruar administrata Trump, me atë të Bidenit, ka ndryshuar edhe kursi i politikës së Kosovës”, theksoi Analisti politik, Arbnor Sadiku, për Gazetën Enigma.

Ndërrimi i shpeshtë i kryemistrave ka ndikuar në mos pasjen e njohjeve të reja, tha ai.

“Krizat qeveritare dhe ndërrimi i shpeshtë i qeverive në Kosovë ka ndikuar në mos pasjen e njohjeve të reja, për vet faktin se janë ndërruar shpesh kryeministrat, dhe ministrat e puneve të jashtme” tha Sadiku.

Gazeta Enigma për këtë qështje ka provuar të komunikoj edhe me Ministrinë e Punëve të Jashtme të Kosovës, por nuk kanë qenë të qasshëm./Gazeta Enigma/

Këto janë vendet që kanë njohur Kosovën si shtet: