Ish-komadanti i Ushtrisë Çlirimtare të Kosovës, Shukri Buja, në dëshminë e tij në Gjykatën Speciale është pyetur për aktivitetin në periudhën e prillit dhe majit të vitit 1998.
Ai është shprehur se në atë periudhë, detyra e parë e tij ka qenë sigurimi i armëve për ushtarët dhe është angazhuar në këtë drejtim.
”Detyra e parë ka qenë me siguru armë për ushtarët dhe normalisht që jam angazhuar për të siguruar armët qoftë brenda kush ka pasur armë dhe i ka sjellur, qoftë përmes Maqedonisë apo Shqipërisë”.
”“S’ke mundur ta bësh ushtarin pa e pasur armën për ta armatosur, ose është dashur ushtari të vije i uniformuar dhe i armatosur, që ka qenë e vështirë me mjete të veta”, është shprehur ai.
Buja shtoi se pas një kohe ka kuptuar që një pjesë të madhe të armatimi e kishin siguruar njerëzit ende pa u kyçur në UÇK.
”Në prill-maj të 98-ës unë kam pasur kontaktin e parë me Agim Bajramin, kontaktin fizik dhe aty jam njoftuar se një pjesë bukur të madhe të armatimin e kanë siguruar njerëzit ende ka u kyçur në UÇK nga Maqedonia dhe atëherë kam kërkuar që ta rregullojmë çështjen e armatimit, që të barten ato armë për njësitet të cilat do të organizohen në Lipjan e Shtime”.
”Por, nëse s’gaboj në maj vetëm kanë nisur luftimet në Grykën e Llapushnikut dhe unë jam angazhuar që t’i përcjell ato armë për Grykën e Llapushnikut”, është shprehur tutje ai.
Kujtojmë se kryetari i trupit gjykues në Hagë, Charles Smith III i tha Bujës se nëse nuk dëshmon, mund të pasojë gjoba. Smith III tha se trupi gjykues vlerëson se ky dëshmitar është i rëndësishëm po ashtu edhe dëshmia e tij për këtë çështje.
