“Qeveria e mirë, sjell lajme të mira”, tha Kurti sot në fillim të fjalimit të tij, para kabinetit të tij në mbledhjen që solli disa vendime, e ku njëra nga to ishte rritja e shtesave për nënat lehona, nga 170 euro në 325 euro, çka përbën një rritje prej 91.7%, apo gati dyfishim të shtesave.
Në fjalimin e tij të sotëm, Kurti tha se për çdo fëmijë të lindur, mbështetja e Qeverisë vetëm për gjashtë muajt e parë e tejkalon vlerën prej 2 mijë eurosh.
“Kjo nuk ka ndodhur asnjëherë më parë. Me këtë nivel mbështetjeje, mund të krahasohemi me shumë shtete të tjera më të mëdha e të forta ekonomikisht sesa ne”, deklaroi ai.
Përveç rritje të shtesave, Qeveria në detyrë ka marrë vendim qëpunonjësve civilë t’u rritet paga për 55 euro, duke filluar nga muaji korrik.
Por sa ka legjitimet kjo Qeveri në detyrë, që të sjell lajme të mira?
Eksperti i ligjeve të Republikës së Kosovës, Anton Nrecaj, ka thënë për Gazetën Enigma se kjo Qeveri nuk ka legjitimitet për vendime të tilla, sidomos kur kemi të bëjmë me rritjen e pagave, sepse ende nuk është zgjedhur si Qeveri.
“Ajo është Qeveri në largim, e cila i ka kompetencat e kufizuara, jo me marrë vendime të tilla. Pavarësisht se mund të jetë në interes të qytetarit dhe në interesa politike të Qeverisë. Kjo nuk është në harmoni me ligjin, pasi kjo Qeveri në detyrë nuk ka kompetencë ligjore me marrë vendime të tilla. Sa i përket kompetencave, ligji e cakton shumë qartë se çfarë vendime mund të marrë një Qeveri në detyrë”, tha Nrecaj për “Enigmën”.
Njohësi i ligjeve thotë se për këto vendime do të duhej të bëhej ankesa nga institucionet që i mbikëqyrin vendimet e Qeverisë ose nga Avokati i Popullit.
“Ky është vendim kryekëput politik, i cili është në favor të Lëvizjes Vetëvendosje”, u shpreh tutje Nrecaj, ndërkohë që zërat po rriten për zgjedhje të reja të jashtëzakonshme parlamentare, shkaku i dështimeve të njëpasnjëshme të konstituimit tëKuvendit.
“Vendimet e sotme, të pamoralshme politikisht”
Njohësi i çështjeve politike, Xhavit Drenori, në një prononcim për Gazetën Enigma tha se nuk është e moralshme që tash të merren këto vendime, kur tani është Qeveri në detyrë.
“Sa i përket moralit politik, unë mendoj se nuk është e moralshme që tash të merren këto vendime, kur tani është Qeveri në detyrë”, deklaroi Drenori.
“Por qytetarët kanë ankesa, kanë kërkesa. Ka rritje të çmimit të energjisë elektrike, shpenzimeve në përgjithësi, për të cilat nënat lehona kanë nevojë. Por moralisht, kjo rritje nuk do duhej të ndodhte në këtë situatë”.
Po kalkulohet për zgjedhje?
Se nga Lëvizja Vetëvendosje po bëhet një lloj fushate për zgjedhje të jashtëzakonshme, e thotë edhe Drenori.
“Ky vendim sigurisht se është populist, po kalkulohet për zgjedhje. Por kjo veç se pritej, pasi çdo Qeveri bën gjëra të tilla kur afër janë zgjedhjet, as këta nuk janë të ndryshëm nga Qeveritë e tjera”, tha ai.
Vendimet e tjera nga mbledhja e 261-të e Qeverisë
Përveç rritjeve të shtesave për nënat lehona dhe rritjen e pagave për punëtorët civilë, Qeveria në detyrë po ashtu ka:
· Përcaktuar pagën mesatare me qëllim të kompensimit të pushimit të lehonisë nga Qeveria e Republikës së Kosovës. Agjencia e Statistikave të Kosovës, këtë javë, ka publikuar nivelin e pagës mesatare për vitin 2024, e cila ka shënuar rritje të theksuar viteve të fundit, duke arritur në 639 euro. Nga muaji qershor, lehonat e punësuara do të përfitojnë mbështetjen e paraparë sipas Ligjit të Punës për tre (3) muaj nga Qeveria në vlerën prej 319.5 euro – që është 50% e pagës mesatare referente. Krahasuar me nivelin aktual prej 223 euro, mbështetja e re paraqet një rritje prej 43.3%.
· Ndarë mjetet buxhetore për zbatimin e nenit 33, paragrafi 2. të Ligjit Nr. 08/ L-332 mbi Ndarjet Buxhetore për Buxhetin e Republikës së Kosovës për vitin 2025. Siç është miratuar në Ligjin e Buxhetit, pagat e zyrtarëve publikë këtë vit rriten dy herë nga 55 euro, për të kompletuar rritjen prej 110 euro për të gjithë. Rritja e parë tashmë ka filluar së zbatuari që nga janari i këtij viti. Rritja e dytë do të fillojë zbatimin nga muaji korrik.
· Ndarë mjetet buxhetore për zbatimin e Masës 3.5 pagesa e lehonave të papuna të Pakos së Ringjalljes Ekonomike. Me këtë vendim, nga muaji qershor vlera mujore e shtesave për lehona rritet nga 170 euro në 325.9 euro – aq sa është vlera neto e pagës minimale të re.
· Miratuar rregulloren për Trajnimin dhe Testimin e Detyrueshëm, si dhe Certifikimin e Inspektorëve të Republikës së Kosovës. Kjo rregullore zbatohet për të gjithë inspektorët e punësuar në administratën shtetërore dhe në nivel komunal në tërë Republikën e Kosovës, përveç inspektorëve të organeve inspektuese të përjashtuara nga fushëveprimi i ligjit përkatës për inspektimet.
· Miratuar rregulloren për Procedurën e Pranimit në Shërbimin Civil. Kjo rregullore synon të rregullojë në mënyrë të detajuar dhe të unifikuar të gjitha fazat e procesit të rekrutimit, duke përfshirë shpalljen e konkurseve, përbërjen dhe funksionimin e komisioneve, si dhe procedurat dhe metodat e vlerësimit të kandidatëve.
· Miratuar vendimin Preliminar për shpronësim për interes publik të pronave të paluajtshme të pronarëve dhe zotëruesve të interesit, të cilat preken nga realizimi i projektit: “Ndërtimi i Qarkores së Jashtme të Qytetit të Gjilanit dhe Kyçja e Rrugës Nacionale N25.2 dhe N25.3 deri te Autoudha R7.1”.
· Miratuar vendimin Preliminar për shpronësim për interes publik të pronave të paluajtshme ish-shoqërore “Mekanizmi” që menaxhohen dhe administrohen nga AKP-ja, shpronësimi i të cilave është i nevojshëm për realizimin e projektit: “Ndërtimi i ndërtesave të banimit të përballueshëm dhe social për Komunën e Podujevës”.
· Ndryshuar dhe plotësuar Vendimin e Qeverisë Nr.12/253, të datës 21 mars 2025, për emërimin e Komisionit Ad hoc për Vlerësimin Profesional për Pranim për Pozitën e Lartë të Kategorisë Drejtuese: Sekretar i Përgjithshëm në Ministrinë e Mjedisit, Planifikimit Hapësinor dhe Infrastrukturës. Me këtë vendim kryesuesi i këtij komisioni, Naim Bardiqi, Sekretar i Përgjithshëm i Ministrisë së Shëndetësisë, zëvendësohet me Besim Kamberajn, Sekretar i Përgjithshëm i Ministrisë së Zhvillimit Rajonal dhe Lendita Osaj, Udhëheqëse e Divizionit të Burimeve Njerëzore në Ministrinë e Mjedisit, Planifikimit Hapësinor dhe Infrastrukturës, zëvendësohet me HaveKrashniqin, Udhëheqëse e Divizionit të Burimeve Njerëzore në Ministrinë e Mjedisit, Planifikimit Hapësinor dhe Infrastrukturës.
· Miratuar vendimin për hartimin e Planit Hapësinor për Kompleksin Memoriał “Adem Jashari” në Prekaz. Kompleksi Memorial “Adem Jashari” në Prekaz përfaqëson një ndër proceset më delikate dhe më të rëndësishme për Republikën tonë. Masterplani, i cili është në fazën e hartimit nga një studio e profesionistëve ndërkombëtarë në bashkëpunim me ata vendorë, synon ta shndërrojë Kompleksin në një nga qendrat më të rëndësishme të kujtesës në botë. Përveç projekteve për konservim, restaurim dhe interpretim, parashihet edhe hartimi i dokumenteve të Planifikimit Hapësinor, të cilët do të mundësojnë zhvillimin e një koncepti koherent dhe multidisiplinar për organizimin hapësinor dhe urban të Kompleksit.
· Emëruar Komisionin Ad-hoc për Vlerësimin Profesional për Pranim në Pozitën e lartë të Kategorisë Drejtuese: Drejtor Ekzekutiv në Agjencinë e Regjistrimit të Bizneseve të Kosovës, sipas kësaj përbërje:
o Anita Kalanderi, Sekretare e Përgjithshme e Ministrisë së Drejtësisë – kryesuese;
o Naim Gashi, Drejtor në Agjencinë e Kosovës për Akreditim – anëtar;
o Fahrije Ternava, Sekretare e Përgjithshme e Ministrisë së Punëve të Brendshme – anëtare;
o Arta Bajraktaraj, U.d. Udhëheqëse e Njësisë së Burimeve Njerëzore – anëtare;
o Ylber Elshani, ekspert i jashtëm – anëtar. /GAZETA ENIGMA
