Gjykata Themelore në Ferizaj ka vazhduar masa e paraburgimit ndaj Dardan Krivaqës dhe Arbër Sejdiut, të dyshuarit kryesor për vdekjen e 18-vjeçares Marigona Osmani.
Kështu kanë konfirmuar për Indeksonline nga Gjykata Themelore në Ferizaj, ku thonë se për dy të dyshuarit kanë vazhduar masën e paraburgimit në kohëzgjatje prej dy muaj (deri më 21 nentor 2021).
Sipas Prokurorisë në Ferizaj, ekziston dyshimi i bazuar, se më 22 gusht 2021, i pandehuri Dardan Krivaqa, në banesën e tij me dashje e në mënyrë mizore për motive të ulëta, një natë më parë kishte ushtruar dhunë psikike e dhunë fizike, derisa e ndjera kishte ndërruar jetë.
Aty tutje thuhet se gjatë gjithë kohës i pranishëm ishte edhe Arbër Sejdiu, sepse i njëjti edhe kishte ushtruar dhunë fizike e psikike mbi të ndjerën.
Kurse avokati i familjes së 18-vjeçares së ndjerë Marigona Osmani, Gazmend Rexhepi, tregoi që deri më tani nuk ka pranuar raportin e plotë të autopsisë lidhur me rastin e vdekjes së saj, përveç një çertifikatë nga Mjekësia Ligjore e Kosovës e cila i është dorëzuar familjes të së ndjerës disa ditë pas rastit tragjik.
