Lëvizja Vetëvendosje ka mohuar se kanë bërë koalicion me Lidhjen Demokratike të Kosovës në Junik.
Sekretari për Media dhe Komunikim në Lëvizjen Vetëvendosje, Arlind Manxhuka ka deklaruar për Gazetën “Enigma” se nuk është arritur marrëveshje për koalicion në Junik.
“Ka diskutime por jo marrëveshje”, ka thënë shkurt tha Manxhuka.
Ndërsa, qëndrimin zyrtar të Lëvizjes Vetëvendosje, rreth këtij koalicioni e ka sqaruar edhe anëtari i kësaj partie, Besart Tofaj, ku e demanton lajmin të cilin e kishte dhënë kandidati për kryetar të Junikut, Ruzhdi Shehu nga Lidhja Demokratike e Kosovës, që sipas tij është arritur një marrëveshje mes këtyre dy partive.
E këto reagime erdhën pasi që kandidati i LDK-së për kryetar të Junikut, Ruzhdi Shehu ka deklaruar se është nënshkruar koalicioni LDK-LVV në këtë komunë.
“LDK Dega në Junik dhe LVV Qendra në Junik, kanë nënshkruar marrëveshje të bashkëpunimit mes tyre. Ditëve në vijim do të publikojmë edhe programin e përbashkët qeverisës 2022-2025, të cilin do e realizojmë deri në fund brenda mandatit tonë të parë qeverisës”, ka shkruar Shehu.
Tutje tha se ky moment është historik për Junikun sepse fitorja jonë me 14 nëntor dhe ndryshimi pas 12 viteve në Junik është i pandalshëm.
“Të bashkuar me Vetëvendosjen në Junik, tanimë kemi shumicën e anëtarëve në Kuvendin Komunal të Junikut (9 nga 15 ose 60% e ulëseve në Kuvendin e Junikut). Padyshim që do të kemi edhe përkrahjen e nevojshme nga Qeveria e Kosovës për të realizuar projektet tona zhvillimore për Junikun. Kur kësaj i shtojmë edhe mbështetjen pa rezervë që kemi nga mërgata e Junikut, nuk mbetet asnë dilemë se me 14 nëntor do të konfirmohet fitorja jonë në Komunën e Junikut”.
“Ju ftoj që në vijim të ndjekni disa pamje nga ceremonia e nënshkrimit të marrëveshjes së koalicionit në mes të LDK dhe LVV në Junik”, shkroi Shehu./Gazeta “Enigma”/
