Zëdhënësi i KEDS-it, Viktor Buzhala, ka reaguar për protestën kundër shtrenjtimit të rrymës, e cila u paralajmëruar për të shtunën nga Partia Socialdemokrate, shkruan Gazeta Enigma.
Buzhala përmes një postimi në Facebook, ka ironizuar duke shkruar se PSD i ka nëntë anëtarë, e dhjetë prej tyre dalin në televizor .
“Ky i 10’ti nuk është realisht pjesë e partisë, por thotë që jam veç për me dal në TV. A e dini pse ftohen prej mediave këta politikanë që nuk e përfaqësojnë askënd, nime?”, shkruan ai.
Ndryshe, protesta u paralajmërua të mbahet të shtunën, duke filluar nga ora 14:00 në Sheshin “Zahir Pajaziti”.
“Të shtunën, më 29 janar, në orën 14:00, takohemi në Sheshin “Zahir Pajaziti” për të protestuar kundër këtij shtrenjtimi të energjisë elektrike”, thuhet në njoftimin e PSD-së.
Në njoftimin e PSD-së ku bëhet thirrje për protestë, kryeministri Albin Kurti është quajtur “zëdhënës i KEDS-it”.
“Qeveria është rreshtuar me monopolin privat. KEDS-it po i bën zgjidhje, kurse qytetarëve diciplinë e shtrenjtim. Si zëdhënës i KEDS-it, kryeministri po pyet “ku ti marrim paratë për të paguar importin e rrymës”? Por nuk po bën pyetje nga pozicioni i qytetarëve: “me çka të ngrohemi ne, nëse jo me rrymë? Ku t’i marrim paratë për ta paguar rritjen e çmimit?””, thotë PSD.
Tutje në njoftim thuhet se “Qeveria ka marrë anë. Është reshtuar me bizneset e mëdha private. Të vetmit që nuk do të preken nga rritja e rrymës. Është koha të marrim anë edhe ne. Ne qytetarët që do t’ua paguajmë rrymën oligarkëve. Është koha të organizohemi kundër kësaj padrejtësie”. / Gazeta Enigma/
