Federata e Futbollit e Kosovës e ka përshëndetur vendimin e FIFA-s për dënimin që ia dha të premten Federatës së Futbollit të Serbisë për ofendimet ndaj Xherdan Shaqirit dhe Granit Xhakës, në ndeshjen e Kupës së Botës ndërmjet Zvicrës dhe Serbisë.
Zvicra e fitoi atë ndeshje 3:2, por pati shumë thirrje fyese të tifozëve ndaj shqiptarëve që ishin protagonistë në atë fitore.
FIFA e dënoi me 50 mijë franga federatën serbe edhe për sjelljen e lojtarëve serbë në fushë që ishin josportive.
“Federata e Futbollit e Kosovës mirëpret faktin që janë marrë në konsideratë ankesat dhe vërejtjet e saj drejtuar Komisionit Disiplinor të FIFA-s, lidhur me fyerjet dhe sjelljet josportive të futbollistëve, zyrtarëve dhe tifozëve të ekipit të Serbisë kundër shqiptarëve dhe Kosovës, gjatë ndeshjeve në kuadër të Kupës së Botës “Katari 2022”.
FFK në vazhdimësi, sa herë që ka sjellje të tilla josportive dhe fyerje në drejtim të Kosovës dhe popullit të saj, që bien ndesh me rregullativën e FIFA-s dhe UEFA-s, do të reagojë në këto instanca me argumente e dëshmi dhe bazuar në aktet normative, ngase veprimet e tilla, të kujdoqofshin, janë kundër vlerave që përçon dhe promovon futbolli dhe si të tilla duhet të ndëshkohen”, shkruan FFK-ja në Facebook.
Reagim menjëherë pas dënimit të FIFA-s ka bërë edhe Ministri i Kulturës, Rinisë dhe Sportit, Hajrulla Çeku, që e uroi FIFA-n për këtë vendim.
/Gazeta Enigma/
