Ambasadorët e rinj amerikan në Kosovë dhe Serbi, si dhe mbështetja e theksuar në letrën e Sekretarit amerikan të Shtetit, Antony Blinken, pritet t’i japin një dinamikë të re dialogut Kosovë-Serbi.
Njohësit e procesit të dialogut po i kërkojnë institucioneve të vendit të përfitojnë nga qasja e re amerikane për konsolidimin e shtetësisë dhe subjektivitetit ndërkombëtar të Kosovës, por edhe fuqizimin e marrëdhënieve ndërmjet dy shteteve.
Violeta Haxholli nga Instituti Demokratik i Kosovës, thotë se prapavija e ambasadorëve të emëruar në Kosovë dhe Serbi, tregon rëndësinë që SHBA-ja dëshiron t’i jap arritjes së marrëveshjes finale mes dy vendeve.
“Në bazë të prapavijës së këtyre dy figurave, shihet se ata kanë një eksperiencë në proceset negociatore që kanë kaluar Kosova, qoftë në Rambuje apo Vjenë. Prandaj prapavija e tillë na bënë të mendojmë se ndoshta ata janë emëruar që të kenë një rol më të madh në procesin e dialogut të Kosovë-Serbi, por edhe çështje të tjera rajonale që kanë dal në pah. Prandaj, roli i tyre në procesin e dialogut do të jetë më i madh dhe interesimi apo vëmendja e administratës për këto procese do të jetë më e lartë. Kosova është mirë të përfitojë nga përvoja e ambasadorit amerikan në proceset negociatore”, tha ajo.
“Ne si shtet mund të përfitojmë nga përvoja e tij në procesin negociator. Besoj se Qeveria e Kosovës sa i përket politikës së jashtme në përgjithësi, por edhe dialogut në veçanti duhet që veprimet e saj t’i koordinojë me ambasadën amerikane këtu dhe përfaqësuesit amerikan, duke ditur rolin e tyre në konsolidimin e subjektivitetit ndërkombëtar të Kosovës”, thotë ajo.
Mendim të njëjtë ndanë edhe njohësi i procesit të dialogut, Gazmir Raci, i cili thotë se pas letrës së sekretarit Blinken, roli amerikan do të jetë më i fuqishëm në dialogun Kosovë-Serbi. Sipas Racit, politika e jashtme e Kosovës duhet të shkojë në linjë me politikën e jashtme amerikane.
“Roli amerikan është i patjetërsueshëm dhe pazëvendësueshëm, andaj edhe politika jonë e jashtme duhet të shkojë në linjë me politikën e jashtme amerikane. Natyrisht se ambasadorët e rinj si në Prishtinë, ashtu edhe në Beograd janë persona që në të kaluarën e tyre kanë qenë të involvuar direkt në lirinë, pavarësinë dhe shtet ndërtimin e Kosovës. Ekspertiza e tyre është e nevojshme edhe për Shtëpinë e Bardhë, por edhe fuqizimin e marrëdhënieve në të ardhmen”, thotë ai.
Të enjten, sekretari i shtetit i Shteteve të Bashkuara të Amerikës, Antony Blinken, i dërgoi letër kryeministrit të Kosovës, Albin Kurti.
Aty thuhej se marrëdhënia SHBA-Kosovë është e rrënjosur në vlerat e përbashkëta demokratike dhe zotimin për Kosovë sovrane dhe të pavarur.
Ndërsa në fillim të javës në Kosovë erdhi ambasadori i ri, Jeffrey Hovenier. Kurse, në Serbi është emëruar ambasadori Christopher Hill. /Gazeta Enigma.
