Kryeministri i Kosovës, Albin Kurti, është parë në mesin e pjesëmarrësve në ceremoninë e varrimit të 18-vjeçares M.O., që u vra dy ditë më parë në banesën e partnerit të saj në Ferizaj.
Për vrasjen e saj, Kurti ka reaguar edhe mbrëmë me anë të një postimi në profilin e tij në Facebook. Mes të tjerash kryeministri ka thënë se Kosova nuk ka jetë grash dhe vajzash për të humbur.
“Një 18 vjeçareje dje iu ndalën përgjithmonë dëshirat dhe ëndrrat. Ajo nuk e humbi jetën në aksident trafiku apo konflikt lufte. Jeta e saj u shua dhunshëm në mjedisin ku çdo njëri nga ne duhet të ndihet i dashur, i respektuar e mbi të gjitha i mbrojtur”, është shprehur Kurti ndër të tjera.
Para se të niste ceremonia e varrimit, në Ferizaj u protestua dhe u kërkua drejtësi për vrasjen e 18-vjeçares.
Protesta u përcoll me numër të madh të pjesëmarrësve dhe me pankarta të ndryshme, ndërsa disa nga pjesëmarrësit u hodhën ngjyrë të kuqe policëve që po përkujdeseshin për sigurinë në hyrjen e oborrit të stacionit policor.
Njëherit, Policia e Kosovës ka njoftuar se është arrestuar, Dardan Krivaqa, i dyshuar për vrasjen e 18 vjeçares në Ferizaj.
Kjo u bë e ditur në protestën e sotme në Ferizaj lidhur me vrasjet e grave, nga majori i Policisë në Ferizaj, Mehmet Alihajdini.
“Ai është arrestuar në Ferizaj, para 5 minutave. Është arrestuar në territorin e Ferizajit, në një fshat”, tha Alihajdini.
Tutje ai ka njoftuar se Policia do të dalë me komunikatë për media me më shumë detaje.
Edhe Prokuroria ka dhënë më shumë detaje lidhur me arrestimin.
“Prokuroria Themelore në Ferizaj, , njofton opinionin publik se lidhur me rastin e vdekjes së 18 vjeçares në Ferizaj, sot rreth ores 12 e 05 minuta, është arrestuari edhe personi i dytë i dyshuar (D,) në kohëzgjatje prej 48 orësh, për shkak të dyshimit se i njëjti në bashkëkryerje ka kryer veprën penale ‘Vrasje e rëndë’ të Kodit Penal të Republikës së Kosovës (KPRK)”, thuhet në njoftim.
Kujtojmë se18-vjeçarja M.O dyshohet se u vra nga partneri i saj dhe më pas është lënë në Spitalin Rajonal të Ferizajt nga ai edhe një person tjetër i dyshuar, i cili ndodhet në pranga.
Vrasja e 18-vjeçares M.O., ditën e diel në Ferizaj ka ngjallur reagime të shumta në vend./Gazeta Enigma.
I jepet lamtumira e fundit 18-vjeçares që u vra në Ferizaj from Ekonomia Online on Vimeo.
