Rezoluta e opozitës kundër shtrenjtimit të rrymës nuk është miratuar të mërkurën nga Kuvendi i Kosovës, raporton Gazeta Enigma.
Kjo rezolutë mori vetëm 30 vota pro.
Ishin deputetët e VV-së të cilët nuk morën fare pjesë në votim dhe si e tillë rezoluta dështoi.
Shefi i Grupit Parlamentar të AAK-së, Besnik Tahiri, propozoi të mërkurën në Kuvend miratimin e rezolutës për anulimin e vendimit të ZRRE-së për shtrenjtim të energjisë.
Ai kishte thënë se kjo rezolutë është në përkrahje edhe të partive tjera opozitare. Tutje ai kishte kërkuar edhe shkarkimin e bordit të ZRRE-së
“Në mbështetje të nenit 65 grupi i AAK, PDK dhe LDK i propozojmë kuvendit miratimin e kësaj projekt rezolute. Deputetët e AAK, PDK dhe LDK votojnë për anulimin e vendimit të ZRRE për shtrenjtimin e energjisë elektrike, ku nuk ka vota mjaftueshëm dhe shtyhet për seance tjetër”, ka deklaruar Tahiri.
“Deputet e kuvendit kërkojnë që vendimi i ZRRE të anulohet menjëherë. Kuvendi të inicioje shkarkimin e bordit të ZRRE-së. Qeveria subvencionojë çmimin e energjisë. Qeveria të heqë TVSH për energji. Qeveria të angazhohet për themelimin e fondit për konsumatorë në nevojë. Të nisin konsultime për tarifa të reja”, ka thënë ai.
Më poshtë gjeni tekstin e Rezolutës i propozuar nga PDK, AAK dhe LDK:
Në një situatë të renduar ekonomike si dhe ndikimit zingjiror të krizave, shtrenjtimi është i papërballueshëm për shumicën e familjeve në Kosovë. Diferencimi i konsumatorëve është jashtë frymës kushtetuese dhe shkelje e të drejtave të njeriut.
Vendimi i ZRRE-së për shtrenjtimin e rrymës të anulohet menjëherë.
Kuvendi të iniciojë shkarkimin e bordit të ZRRE-së për mungesë profesionalizmi.
Qeveria të subvencionojë çmimin e rrymës për të gjithë qytetarët linearisht.
Qeveria të heq TVSH-në për energjinë.
Qeveria të angazhohet për themelimin e fondit për konsumatorët në nevojë.
Të nisin konsultimet për tarifat e reja që duhet të jenë pjesë e strategjisë./Gazeta Enigma/
