Kryetari i Partisë Republikane në Serbi, Nikolla Sanduloviq ka publikuar një foto nga dhoma e tij e gjumit, aty ku po qëndron shtrirë që nga dita kur u lirua nga paraburgimi në Serbi.
Ai po rikuperohet nga lëndimet që mori nga rrahja dhe maltretimi që iu bë sic thotë ai zyrtarët e BIA-s serbe.
Sanduloviq mbrëmë është vizituar nga një avokat nga Londra. Michael Polak bashkë me avokatin serb Cedomir Stojkoviq do të drejtojnë ekipin ligjor që sot do të paraqesin një kallëzim penal kundër disa oficerëve të Agjencisë për Informim të Sigurisë (BIA) për krimin e keqtrajtimit dhe torturës të kryer me rrahjen e tij në fillim të janarit të këtij viti
“Përfaqësuesit do t’i gjejnë dhe ndëshkojnë vrasësit dhe kriminelët e BIA-s që tentuan të më vrisnin!”, ka shkruar ai.
Ish-shefi i Agjencisë së Sigurisë dhe Informacionit e Serbisë (BIA), Aleksandar Vulin tha më 6 janar se Sandulloviqi ishte arrestuat me urdhër të tij, urdhër që sipas tij është në fuqi edhe pas dorëheqjes së tij.
Vulin tha për mediat serbe se arsye për arrestimin e tij ishte vendosja e kurorave me lule në fshatin Prekaz në Kosovë.
Më herët, Zyra e Prokurorit në Nish kishte konfirmoi për Radion Evropa e Lirë se Sandulloviq ndodhej në paraburgim prej 5 janarit, nën dyshimet “se ka kryer vepër penale të nxitjes së urrejtjes dhe mosdurimit kombëtar, racor dhe fetar”.
Opozitari serb, Nikolla Sanduloviq, i cili është në përkujdesje në shtëpi pas lirimit nga paraburgimi, tha se i është nënshtruar “dhunës disa orësh nga pjesëtaret e BIA-së”, për shkak të së cilës ka pësuar disa lëndime të rënda.
“Më rrahën, më rrahën dhe më kërcënuan mua dhe familjen time. Kjo tregon se në çfarë lloj sistemi jetojmë. Unë nuk do të ndërhyj dhe ndikoj në hetim në asnjë moment, por do të kërkoj përgjegjësi të plotë për atë që më ndodhi. Nëse ka drejtësi dhe nëse prokuroria në Serbi është e pavarur, atëherë do të zbulohet rasti im”, tha ai.
Ndryshe, BIA ka mohuar se Sanduloviqi i është nënshtruar torturës, duke pretenduar se nuk ka pasur shkelje të lirive dhe të drejtave, si dhe përdorim të paligjshëm të forcës fizike.
“Anëtarët e BIA-s kanë ndërmarrë aktivitete që kanë për qëllim zbardhjen e historisë së veprimtarisë së paligjshme të Sanduloviqit, të cilën prokurori kompetent e ka cilësuar si vepër penale të nxitjes së urrejtjes dhe intolerancës kombëtare, racore dhe fetare”, thuhet në deklaratën e BIA-s më 10 janar.
Dhe Prokuroria e Dytë Themelore Publike në Beograd njoftoi se “provat e mbledhura nuk çojnë në përfundimin e ekzistencës së pretendimeve mjaft bindëse dhe indikacioneve të qarta se abuzimi ka ndodhur në rastin e Sanduloviqit”.
Pas ndalimit, Sanduloviq u kthye në shtëpi në gjendje të rëndë, ndërsa thotë se pjesa e djathtë e trupit të tij “ishte e paralizuar”. Sot ai po shërohet dhe po pret si do të zhvillohet rasti i tij.
Sanduloviq akuzohet se “ka kryer veprën penale të nxitjes së urrejtjes dhe jo-tolerancës kombëtare, racore dhe fetare”. Kjo pasi në rrjetet sociale ka njoftuar se ka kërkuar falje për krimet ndaj shqiptarëve dhe ka treguar se ka vendosur lule në varrin e familjes së Jashari ne Prekaz.
Pasi që ende nuk është intervistuar nga prokuroria, Sanduloviq thotë se do t’i përgjigjet ftesës për të pasur mundësi t’i përgjigjet akuzave.
“Çfarë krimi është nëse vendosi lule mbi varrin një vajze të vrarë shtatëvjeçare, ku ka faj ajo, kushdo qoftë babai i saj, çfarë lidhje ka kjo me vajzën. E bëra si njeri, babai, bashkëshorti, si lider i një partie, politika e së cilës është paqja dhe pajtimi në rajon. E konsiderova si detyrim njerëzor dhe moral të shpreh respektin dhe keqardhjen për vrasjen e një vajze shqiptare në këtë rast, të gjithë fëmijët janë viktima të pafajshme”, thotë Sanduloviq.
