Të paktën krahasuar me prillin e vitit 2023, raporti i fundit i UNDP-së tregon se gjatë nëntorit në një anketë të realizuar, është rritur numri i qytetarëve serbë që ndjehen të sigurt gjatë lëvizjes në rrugët e Kosovës.
Ndonëse ky krahasim është pozitiv krahasuar me të dhënat e fundit por jo me ato të viteve të kaluara, njohësit e fushës së sigurisë vlerësojnë se siguria për serbët e Kosovës është rritur edhe për shkak të zhvillimeve në pjesën veriore, dhe sjelljes së institucioneve të sigurisë.
Në komunat veriore në dhjetëra raste janë djegur vetura për qëllime të ndryshme. Në disa periudha për shkak të kundërshtimit të targave “RKS”, e me raste për padëgjueshmërinë e ndonjë politikani lokal ndaj politikave të Beogradit.
Rasti i fundit për arsye që nuk dihen ka ndodhur sot në orët e mëngjesit në Leposaviq. Një veturë e bardhë e tipit Toyota me targa të Rashkës rreth orës 04:00 është djegur, nga persona ende të pa identifikuar. Policia ka njoftuar se dëme materiale kishin pësuar edhe dy vetura të tjera që kishin qenë afër kësaj vetureje.
Pikërisht sigurinë e serbëve në Kosovë, programi i Kombeve të Bashkuara për Zhvillim (UNDP) e ka përfshirë në një hulumtim të publikuar të mërkurën.
Hulumtimi tregon të dhëna pozitive nga të anketuarit serbë për perceptimin e tyre për sigurinë personale kur janë jashtë shtëpive.
Serbët e anketuar gjatë nëntorit të 2023 tregojnë se krahasuar me muajin prill ndjehen më të sigurt.
Në nëntor 37.6% e serbëve të anketuar kanë deklaruar se ndjehen të sigurt në Kosovë. Ndërkohë gjatë prillit kjo shifër ishte më e ulët, 33.8%.
Për shembull në nëntor të 2022 raport i UNDP-së, tregonte se vetëm 15.3% e serbëve janë deklaruar se ndjehen të sigurt në Kosovë. Ndërkohë para prillit shifra e serbëve që ndjehen të sigurt i afrohet 50%-shit.
Njohësit e fushës së sigurisë mendojnë se ky ndryshim pozitiv vjen edhe për shkak të ndryshimeve në terren, sidomos në pjesën veriore.
“Tregon një rritje të besueshmërisë në institucionet e sigurisë së Kosovës, përgjithësisht është një lëvizje e lirë, edhe kjo e fundit që KFOR-i ka vlerësuar që gjendja e sigurisë në veri është e mirë edhe ka vendosur tërheqjen nga objektet edhe komunave që ka siguru deri tash edhe janë vendosë policia e Kosovës. Mendoj që të gjitha këto tregojnë rritjen e besueshmërisë”, ka deklaruar Nuredin Ibishi, njohës i fushës së sigurisë.
Ibishi thotë se institucionet e Kosovës duhet të kenë edhe fushata informimi për çdo veprim që ndërmarrin, duke e shpjeguar në gjuhën e secilit komunitet.
