Nuk ka sjell fitues derbi i javës së katërt në BKT Superligën e Kosovës në futboll mes Prishtinës dhe Gjilanit.
Ka qenë një ndeshje spektakolar sidomos në fundin e saj, por që në fund dy skuadrat u desh të kënaqen me nga një pikë 1-1.
Blerim Krasniqi pati një rast të mirë për Gjilanin në minutën e 10-të, por pa sukses.
Te Prishtina rrezikoi dy herë Xhevdet Shabani dhe një herë tjetër Leotrim Kryeziu, por pa mundur ta dërgojnë topin në rrjetë.
Kësisoj 45 minutat e para përfunduan ashtu siç filluan me rezultat të bardhë 0-0.
Pjesa e dytë ishte më ofensive për të dyja skuadrat që shënuan edhe nga një gol.
Megjithatë për ta parë golin e parë në ndeshje u desh të pritej minuta e 84-të, kur Armend Halili shkaktoi penallti në Guathier Mankendën dhe mbrojtësi i Gjilanit u përjashtua nga ndeshja pas kartonit të dytë të verdhë.
I saktë nga pika e bardhë ishte Besnik Krasniqi që shënoi për 1-0.
Pas golit të pranuar, e gjithë skuadra e Gjilanit shkoi në sulm për ta kërkuar barazimin.
Mysafirët e arritën qëllimin, pasi në minutën e 96-të Albert Dabiqaj realizoi me kokë pas asistimit nga Elton Cale për rezultatin përfundimtar 1-1.
Prishtina edhe pas katër jave mbetet pa fitore në Superligë, derisa ka vetëm dy pikë.
Në anën tjetër Gjilani ndodhet në vendin e gjashtë në tabelë me gjashtë pikë, ku ka marrë një fitore e tri barazime.
