Kryeministri i Kosovës Albin Kurti, të hënën do të takohet me kryetarin e Lidhjes Demokratike të Kosovës, Lumir Abdixhikun, lidhur me çështjen e presidentit, raporton Gazeta Enigma.
Koha e takimit nuk është bërë e ditur.
Të dielën, Kurti ka takuar kryetarin e Partisë Demokratike të Kosovës, Bedri Hamza.
Hamza ka thënë se nuk do të jenë pengesë e proceseve shtetërore, por as nuk mbështesin kandidatura që nuk e përfaqësojnë unitetin qytetar.
Hamza përmes një postimi në Facebook, ka thënë po ashtu se uron që të reflektojnë ata që kanë përgjegjësi kushtetuese për të propozuar kandidatura me mbështetje të gjerë.
“Si subjekt politik opozitar, nuk kemi qenë dhe nuk jemi pengesë e proceseve shtetërore, por as nuk mbështesim kandidatura që nuk përfaqësojnë unitetin qytetar, sipas frymës kushtetuese. Uroj që të ketë reflektim nga ata që e kanë përgjegjësinë kushtetuese për të propozuar kandidatura me mbështetje të gjerë, duke shmangur kalkulimet afatshkurtra partiake. Stabiliteti institucional është jetik dhe duhet të trajtohet si i tillë”, ka shkruar Hamza.
Sipas Kushtetutës, zgjedhja e presidentit duhet të bëhet jo më vonë se 30 ditë para përfundimit të mandatit të presidentit aktual. Osmani është zgjedhur presidente më 4 prill të 2021-tës, ndërsa detyrën e mori një ditë më pas. Dështimi për ta zgjedhur kreun e shtetit imponon zgjedhje të parakohshme.
Javën e kaluar, kryetarja e Kuvendit, Albulena Haxhiu, ka thënë se është në pritje të kandidaturave për president, për të ftuar seancën për zgjedhjen e tij apo saj. Ajo ka theksuar se e gjithë procedura duhet të përmbyllet deri më 4 mars, por ka rikujtuar se nuk mund të veprojë pa pasur kandidatë që deponojnë edhe nënshkrimet mbështetëse paraprake.
