Përfaqësuesi special i Bashkimit Evropian për dialogun Kosovë-Serbi, Miroslav Lajçak ka thënë se Kosova e Serbia janë afër arritjes së një marrëveshjeje në lidhje me disa dokumente.
Përmes Twitter-it, Lajçak ka thënë se megjithëse janë afër kësaj marrëveshjeje, hapi i fundit shpesh është më i vështiri.
“Pas 11 orësh negociata intensive dje, jemi afër arritjes së një marrëveshjeje për disa dokumente. Por shpesh hapi i fundit është më i vështiri. Puna vazhdon”, shkruan Lajçak.
Ndryshe, Telegrafi merr vesh se kjo marrëveshje ka të bëj me energjinë dhe një dokument tjetër me rëndësi për dialogun.
Kurse, zëvendëskryeministri i Republikës së Kosovës për Integrim Evropian, Zhvillim dhe Dialog, Besnik Bislimi, gjatë të martës zhvilloi takime dypalëshe me Përfaqësuesin special të Bashkimit Evropian për dialogun Kosovë-Serbi, Miroslav Lajçak.
Në njoftimin nga Qeveria thuhet se në këto takime u diskutua për çështjen e personave të zhdukur me forcë gjatë luftës në Kosovë, për ndjeshmërinë dhe urgjencën e një zgjidhjeje sa më të shpejtë.
“U fol për energjinë në kuadër të marrëveshjes ekzistuese. Diskutimet me Bashkimin Evropian në këtë fushë kanë shënuar progres, megjithatë mbeten ende detaje për t’u trajtuar”, thuhet në njoftim. / Gazeta Enigma.
