Ditë më parë mediat në Shqipëri kanë ngritur dyshime për një bakterie që pretendohet se është gjetur në mishin e pulës të importuar nga Brazili, raporton Gazeta “Enigma”.
Lamir Thaçi nga Agjencia e Ushqimit dhe Veterinës ka folur për gjendjen e mishit të pulës, pas skandalit në Shqipëri ku u gjetën rreth 8 ton mish pule i kontaminuar në salmonelë.
Thaçi në një përgjigjë për Gazetën “Enigma” tha se kanë marrë veprimet e nevojshme për t’i hequr të gjitha dyshimet dhe që të mbahet i qetë konsumatori në produktet që i konsumon.
“Deri me tani nuk ka ndonjë fakt qe lidh rastin e incidentit të mishit në Shqipëri me Kosovën. Agjencia e Ushqimit dhe Veterinarisë përmes trupave inspektuese ka ndërmarr të gjitha veprimet ekzekutive shtesë, për të hequr dyshimet për mishin me origjinë nga Brazili”, ka deklaruar ai.
Tutje Thaçi ka theksuar se “pas lëshimit të urdhëresës për kontrolle shtesë, në import kanë ardhur 7 ngarkesa. Nga secila është marrë nga një mostër, ku sipas procedurës ngarkesat mbesin të bllokuara deri në nxjerrje të rezultateve”.
Pas kësaj janë kryer edhe dy kontrolle në pika shitëse deklaroi ai, ku ka theksuar se sasitë e lotëve janë tërhequr dhe bllokuar deri në publikimin e rezultatit të tyre.
“Po ashtu në kontrollin e brendshëm janë realizuar dy kontrolle në pika shitëse, nga të cilat janë marrë dy mostra nga lote të ndryshme prodhimi. Sasitë e lotëve të mostruara janë tërhequr dhe bllokuar deri në rezultate. Është inspektuar edhe depoja e operatorit e ekonomik importues, tek e cila përveç masës se ndalesës se përkohshme të nxjerrjes në treg të produktit në stok, është marrë një mostër për testim”, thai ai për “Enigmën”.
Sipas Thaçit të gjitha mostrat janë në laborator ka nisur procesi i testimit, por ende nuk dihet se kur mund të dalim me rezultate, pasi gjithçka varet nga dinamika e procesit të testimit.
“Të gjitha mostrat janë mbledhur nga pikat kufitare dhe kontrolli i brendshëm. Ato janë në laborator dhe ka nisur procesi i testimit. Për kohen e nxjerrjes se rezultateve, nuk mund të japim afat ose datë tani. Gjithçka varet nga dinamika e procesit të testimit nga laboratori. Në momentin e parë të nxjerrjes se rezultateve, do ta informojmë publikun me të gjeturat”, ka përfunduar ai.
“Futja e këtij produkti në treg është shkelje shumë e rëndë, janë hapur hetime por dëmi është bërë”
Edhe ish-ministri i Bujqësisë në Shqipëri, Edmond Panariti në një deklaratë për media ka folur lidhur me skandalin e mishit të pulës me salmonelë që është futur në Shqipëri nga Brazili.
Panariti tha se ky produkt duhet të ishte bllokuar deri në bërjen e analizave. Ai e cilësoi shkelje shumë të rëndë futjen e këtij mishi në treg për konsumatoriun.
Tutje ai ka theksuare se “konstatimi i mishit të pulës me salmonelë është një gjë shumë e rëndë dhe meriton vëmendje të posaçme. Për fat të mirë Insitutiti i Sigurisë Ushqimore dhe Veterinarisë zbuloi në metodat e tij analitike prezencën e salmonelës së rrezikshme, e cila nuk është vetëm te mishi i shpendëve por është e kudondodhur. Pra goxha e përhapur. Pra kjo bën dhe më të origjinën e ndotjes së mishit të shpendëve të ardhur nga Brazili. Le ti kthehemi rastit aktual”.
“Ky mish duhej të ishte bllokuar që në anijen që e kishte transportuar, në asnjë mënyrë nuk duhet të ndodhte zhdoganimi i tij. Ka ndodhur një shkelje e rëndë, penetrimi i këtij mishi të ndotur në treg pavarësisht se ISUV, ka depozituar që me 21 mars një fletë analizë, ku konstatohej ndotja serioze e filetove të pulës të ngrirë dhe të importuar nga Brazili”, ka deklaruar ai. /Gazeta Enigma/
