Presidenti amerikan, Donald Trump, njoftoi të mërkurën se ShBA-ja do të vendosë një tarifë bazë për importet nga të gjitha vendet e botës. Përpos tarifës bazë, vendeve të caktuara u është shtuar edhe një përqindje tjetër, shkruan Gazeta “Enigma”.
Nga ky vendim është prekur dhe Kosova, e cila ka marrë nga SHBA-të një tarifë bazë prej 10 për qind, sikurse edhe ndaj Shqipërisë e Malit të Zi.
Por çka realisht nënkupton kjo për Kosovën?
Ekonomistja Yllnore Bytyqi-Shala për Gazetën “Enigma” ka deklaruar se ky vendim i Trumpit mund të ndikoj në ekonominë e vendit tonë.
Nëse tarifat aplikohen ndaj produkteve kosovare , sipas saj ato mund të bëhen më pak konkurruese në tregun atje, gjë e cila do të ndikoj negativisht në prodhuesit vendor.
“Vendimi i administratës Trump për vendosjen e “tarifave reciproke” mund të ketë disa ndikime në ekonominë e Kosovës. Nëse tarifat aplikohen ndaj produkteve kosovare, eksportet mund të bëhen më pak konkurruese në tregun amerikan, duke ndikuar negativisht në prodhuesit vendas”, ka deklaruar ajo.
Sipas saj efektet e plota do të varen nga mënyra se si ky vendim zbatohet.
“Nëse vendimi synon të ulë barrierat tregtare për vendet që kanë tarifa të ulëta ndaj importeve amerikane, Kosova mund të përfitojë nga qasja më e lehtë në tregun e SHBA-së. Megjithatë, efektet e plota do të varen nga mënyra se si ky vendim zbatohet dhe si Kosova do të përshtatë politikat e saj tregtare në përgjigje të tij”, tha Bytyqi-Shala për “Enigmën”.
“Urojmë që shteti i Kosovës të jetë vigjilent në politikat e tij fiskale dhe në hartimin e politikave të sigurisë, të cilat garantojnë stabilitet dhe bashkëpunim me shtetet fqinje. Deri më sot, mungesa e një qasjeje të favorshme në këto aspekte ka ndikuar negativisht në tërheqjen e investimeve ndërkombëtare”, ka deklaruar ajo.
Kurse Drejtori Ekzekutiv i Institutit për Studime Evropiane dhe Global, Jeton Halimi, për Gazetën “Enigma” ka theksuar se vendimi do ndikoj negativisht për Kosovën.
“Vendimin e fundit administratës Trump për “tarifat reciproke” tregtare për të gjithë botën përfshirë edhe Kosovën, vendim jo me vend dhe aspak i mirë për të gjithë vendet e Ballkanit Perëndimor veçanërisht vendi tonë”, deklaroi ai.
Ai e ka cilësuar si të gabuar politikën e Trump.
“Ekonomitë e Ballkanit Perëndimor janë shumë të dobëta me krahasua me shtetet e BE-së, kanë Gjidipin shumë ma të mirë me shpresë këto veprim të pa matura të ndalën sa ma shpejt nga vetë Trump kjo nuk i pëlqen as kunja shto këtu me Grelandën që donë me aneksua me forca speciale të ushtrisë amerikane dhe policisë siç kanë dal në opinion nga mediumet e ndryshme”, ka përfunduar Halimi.
“Taksa e SHBA-së ndaj Kosovës, rëndon edhe më shumë ekonominë”
Dhoma e Tregtisë dhe Industrisë Kosovë, ka reaguar të enjten pas vendimit të fundit të Trumpit që t’i vendosë eksporteve nga Kosova taksën prej 10 për qind.
Dhoma e Tregtisë tutje shprehet se ky vendim pritet ta godasë edhe më shumë eksportin, i cili, sipas saj, nga Kosova drejtë SHBA-ve ka pësuar ulje përgjatë muajve të fundit.
Sipas të dhënave Agjencisë së Statistikave të Kosovës, në dhjetor 2024, eksportet ishin 3.5 për qind, përderisa në muajin janar dhe shkurt 2025, ato ranë në 2.8 për qind, përkatësisht 2.5 për qind në muajin shkurt të këtij viti.
“Dhoma e Tregtisë dhe Industrisë Kosovë, ka kohë që ka alarmuar për një vendim të tillë dhe ka kërkuar nga institucionet që të shfrytëzojnë kanalet diplomatike për të mos ndodhur ky vendim. Gjithashtu, DhTIK i bënë thirrje qeverisë që t’u dalë në ndihmë bizneseve që atakohen nga ky vendim”, thuhet tutje në reagim.
“Me vendimin e fundit të Trump preket edhe Kosova”
Në lidhje me këtë çështje ka reaguar edhe Politologu Agon Maliqi, i cili ka komentuar veprimin e administratës Trump për t`i vendosur “tarifa reciproke”.
Ai përmes një postimi në profilin e tij në Facebook ka bërë me dije se nga ky veprim preket edhe Republika e Kosovës, ku ka theksuar se Kosova për në ShBA eksporton dyshekë.
“Administrata Trump sapo vendosi “tarifa reciproke” tregtare për të gjitha shtetet e botës – një zotim kyç elektoral i Trump. Duke qenë se edhe Kosova vitet e fundit ka filluar të eksportojë në ShBA (sidomos dyshekë), prekemi edhe ne dhe vendet e rajonit (Serbia i ka rreth $700 milionë në vit). Ndërkohë që tarifat më të larta janë vendosur për vendet e Azisë, këto janë përqindjet e tarifave të vendosura për shtetet apo blloqet ekonomike në Evropë”, ka shkruar Maliq
Kujtojmë se nga vendet e tjera nga Ballkani, Serbia është ndëshkuar më së shumti, me 37 për qind, pasuar nga Bosnja dhe Hercegovina me 35 për qind dhe Maqedonia e Veriut 33 për qind. /Gazeta Enigma/
