Kryeministri Edi Rama do të nisë sot turin ballkanik, ku do të zhvillojë takime në Shkup, Prishtinë, Beograd, Sarajevë dhe Podgoricë. Ndalesën e parë kreu i qeverisë do ta ketë në Maqedoninë e Veriut, ku pritet të takohet me kryeministrin maqedonas Dimitar Kovaçevski në orën 11:00 të ditës së sotme.
Në orën 12:00, ata do të mbajnë një konferencë të përbashkët për shtyp. Më pas, Rama do të udhëtojë drejt Prishtinës. Në orën 16:00, Rama do të takohet me presidenten Vjosa Osman pasi kryeministri Albin Kurti refuzoi duke thënë se së pari duhet të mbahet mbledhja e përbashkët e qeverive.
Në orën 17:15, Rama do të takohet me kryetarin e Kuvendit të Kosovës, Glauk Konjufca. Të nesërmen, me 7 Korrik, Rama do të udhëtojë në Bosnje Hercegovinë ku do të pritet nga kryetarja e Këshillit të Ministrave Borjana Kristo dhe më pas do të mbahet një konferencë e përbashkët për shtyp.
Më vonë, në orën 13:45, Rama do të takohet me kryeministrin e Malit të Zi, Dritan Abazovic ndërsa në orën 16:00 do të takohet edhe me presidentin Jakov Milatovic. Më pas do të niset për në Serbi ku do të takohet me presidentin Aleksandër Vuçiç në orën 19:30 dhe më pas do të mbajnë konferencën.
