Viti i ri shkollor 2025/26 në Kosovë do të fillojë më datën 1 shtator, shkruan Gazeta “Enigma”.
Kjo sipas kryetarit të SBAShK-ut, Rrahman Jasharaj, po ndodh pasi aktualisht vendi ynë nuk ka institucione dhe ata nuk kanë ku të drejtohen për kërkesat e tyre.
Ai në një përgjigje për Gazetën “Enigma” ka theksuar se janë në pritje të formimit të institucioneve dhe ta din se kush do ta drejtoj MASHT-in dhe kush do të jetë i pari i Qeverisë që në fillim të kenë dialog me ta për kërkesat e tyre.
“Sa i takon SBASHK-ut ne e kemi analizuar vazhdimisht situatën dhe kemi pasur obligim nga kongresi i jashtëzakonshëm që deri më 20 gusht të shohim se çfarë po bëjmë. Fatkeqësisht nuk janë konstituuar institucionet e Kosovës dhe në këtë situatë që jemi nuk kemi mundësi as të zhvillojmë dialog dhe as të mendojmë për veprime sindikale, pra jemi në pritje që të formohen institucionet që të dihet se kush do të jetë ministër në MASHT kush do të jetë i pari i Qeverisë në mënyrë që të provojmë fillimisht ashtu siç na obligon edhe kongresi pra fillimisht me dialog, e nëse nuk ka dialog siç ndodhi tani e katër vite me Qeverinë Kurti atëherë duhet të mendojmë edhe për veprime sindikale, pra nuk janë të përjashtuara veprimet sindikale por fillimisht po presim që të kemi institucione në mënyrë që të provojmë me dialog e nëse dialogu nuk përfillet atëherë duhet të mendojmë edhe për veprime sindikale për të cilat do të vendos këshilli drejtues i SBASHK-ut”, tha Jasharaj për Gazetën “Enigma”.
A mundet me pas edhe greva?
Tutje ai ka theksuar se me Qeverinë Kurti 2 deri më tani nuk kanë munduar të bëjnë një dialog si duhet, duke kujtuar edhe grevën që u detyruan ta mbanin për më shumë se një muaj, që sipas tij as pas asaj greve nuk patën rezultate të mëdha.
“Varësisht prej situatës, nëse bie një Qeveri siç ishte ajo e Kurti 2 që vazhdimisht e injoronte dialogun por edhe ishte kthyer në armik të sindikatave atëherë kur nuk ka dialog duhet të veprohet me mjete tjera sindikale, pra me protesta dhe greva. Por, për to vendos këshilli drejtues ku janë përfaqësuesit e të punësuarve që nga qershori deri në universitet”, tha ai.
“Pra nuk mund të përjashtojmë asnjërën por ne urojmë që të vie një Qeveria e cila do t’i dëgjojë palët tjera , e cila së të jetë Qeveri e prirë për dialog dhe marrëveshje e jo siç ishte Qeveria Kurti e cila nuk e donte dialogun, nuk i respektonte as vendimet e veta, nuk i analizonte dhe nuk i merrte për bazë as kërkesat tona dhe ne gjatë kohës së Qeverisë Kurti e din edhe opinioni se ishim të detyruar t’a bëjmë atë grevën më shumë se një muaj pastaj kishim edhe protesta por edhe ato nuk rezultuan me rezultate të mëdha ngase Qeveria Kurti nuk i donte sindikatat dhe dialogun”, deklaroi Jasharaj për “Enigmën”.
“Urojmë që në Qeverinë e re ta kemi një ministër që e donë arsimin dhe Kosovën”
Jasharaj ka uruar që në Qeverinë e re të ketë njerëz me të cilët mund të kontaktojnë dhe bashkërisht edhe ti zgjedhin problemet me të cilat ballafaqohet arsimi në vendin tonë.
“Urojmë që t’a kemi një ministër që e donë arsimin, urojmë t’a kemi një Qeveri që e do Kosovën dhe se me njerëzit e saj, me sindikatat dhe me të tjerët të ulet dhe të bisedon ashtu si duhet dhe bashkërisht të provojnë që t’i zgjedhin kërkesat që janë legjitime të anëtarësisë”, tha ai.
Mesazhi juaj?
“Mesazhi ynë është që të formohen sa më shpejtë institucionet, por institucione të tilla që do t’a din vlerën e dialogut që do të ulet dhe do të bisedoj me sindikatat , e jo Qeveri që e shohin sindikatën si armiqtë tyre”, ka përfunduar Jasharaj.
Kujtojmë se edhe për këtë vit shkollor Ministria e Arsimit Shkencës dhe Teknologjisë ka financuar blerjen e librave. /Gazeta Enigma/
